Ֆոտոշարք. «Մեկնարկ և ընթացք». Թերլեմեզյան քոլեջի ու Գեղարվեստի ակադեմիայի համատեղ ցուցահանդեսը

«Մեկնարկ և ընթացք» ցուցահանդեսն արդեն երկրորդ համագործակցությունն է Հայաստանի գեղարվեստի պետական ակադեմիայի և Երևանի Փանոս Թերլեմեզյանի անվան գեղարվեստի պետական քոլեջի միջև:

 Ցուցահանդեսը յուրահատուկ երկխոսություն է երկու հաստատությունների միջև, որոնցից յուրաքանչյուրն ունի արվեստի դասավանդման իր առանձնահատուկ մոտեցումը: Ցուցադրությունը դիտողին հնարավորություն է ընձեռում ծանոթանալ և բացահայտել գրաֆիկայի տեխնիկաները, դրանց ոճական առանձնահատկություններն ու անսահման հնարավորությունները՝ ուսանողների սեփական մեկնաբանությամբ:

Աշխատանքների այս հավաքածուն մատնանշում է ուսանողների կրեատիվության, արդի տեխնիկական հմտություններին տիրապետելու մասին՝ թարմ շունչ հաղորդելով գրաֆիկական դիզայնի և վիզուալ հաղորդակցության զարգացող աշխարհին:

 Այս նախագիծը փորձի փոխանակման ամուր հարթակ է ապահովում, հնարավորություն ընձեռում ընդլայնելու Ակադեմիայի և Քոլեջի միջմշակութային կապը: Իսկ նման համագործակցությունները ամրապնդում են ինստիտուցիոնալ և գործընկերային հարաբերությունները՝ ապահովելով ուսանողների շարունակական մասնագիտական զարգացումն ու առաջընթացը։

Ցուցադրության համակարգողներն են Լիանա Խաչատրյանը (ՀԳՊԱ) և Ելենա Մովսեսյանը (ԵԹԳՊՔ):

«Մեկնարկ և ընթացք» ցուցահանդեսը ներկայացված է  Ալբերտ և Թով Բոյաջյան ցուցասրահում, այն կգործի   մինչև նոյեմբերի 28-ը։