Կառավարությունն այսօր ընդունեց մի կարևոր նախագիծ, որը վերաբերվում է գյուղատնտեսական լիզինգին։ Մասնավորապես լիզինգի ծրագրով մենք ունենք բազմաթիվ ֆերմերային տնտեսություններ՝ խոշոր ինստիտուցիոնալ տնտեսություններ, որոնք վաղուց չէին կարողանում օգտվել մեր ծրագրից, որովհետև ծրագիրը ուներ սահմանաչափ. 250 միլիոն դրամից ավել գյուղտեխնիկա գնելուց հետո արդեն տոկոսները չէին փոխհատուցվում։ Լրագրողների հետ զրույցում այս մասին այսօր ասաց ՀՀ էկոնոմիկայի նախարար Գևորգ Պապոյանը։
«Մենք այսօր այդ շեմը բարձրացրեցինք 500 միլիոն դրամի, և սա նաև շատ լավ առիթ է մեր տնտեսվարողներին ցույց տալու ևս մեկ անգամ հիշեցնելու, որ այդպիսի ծրագիր ունենք։ Օրինակ՝ մեր գյուղաբնակ քաղաքացիներին կարող եմ տեղեկացնել, որ 6,4 միլիոն դրամից սկսած՝ տրակտորներ գոյություն ունեն, և իրենք ընդամենը պետք է վճարեն այդ 6,4 միլիոնի 20 տոկոս կանխավճարը, իսկ մնացածը, եթե սահմանամերձ վայրերում են ապրում, ապա հինգ տարվա ընթացքում մաս-մաս պետք է վճարեն։ Բոլոր տոկոսները պետությունը իրենց տեղը կվճարի, իսկ ոչ սահմանամերձում 14 տոկոսային կետից 12-ն է պետությունը վճարում։ Ընդամենը երկու տոկոսային կետ է քաղաքացին վճարում, որը մի քանի հազար դրամից մի քանի տասնյակ հազար դրամ է կազմում, հետևաբար սա շատ մատչելի հնարավորություն է»,- նշեց նախարարը։
