Հայաստանից մարդասիրական բեռով շարասյունը դեռ սպասում է Լաչինի միջանցքով Լեռնային Ղարաբաղ մուտք գործելուն։ Այս մասին Twitter-ի իր էջում գրել է ՀՀ փոխարտգործնախարար Վահան Կոստանյանը։
«Ադրբեջանն այդպիսով անտեսում է ՄԱԿ–ի Արդարադատության միջազգային դատարանի իրավաբանորեն պարտավորեցնող հրամանը՝ կապված ԼՂ անարգել մուտք ապահովելու հետ։
Բացի այդ, Բաքվից անմարդկային ու ցինիկ հայտարարություններ են հնչում, թե խաղն ավարտված է»,–գրել է Կոստանյանը։
Հուլիսի 26-ին առաջին անհրաժեշտության 400 տոննա ապրանքով բեռնված 19 մեքենա Երևանից ուղևորվել է ավելի քան 225 օր շրջափակման մեջ գտնվող Արցախ։ Բեռնատարները, ինչպես և նախատեսված էր, հասել են Կոռնիձոր և կանգ առել․ Ադրբեջանի կողմից արգելափակված Լաչինի միջանցքով ճանապարհը շարունակելու համար սպասում են ՌԴ խաղաղապահների պատասխանին։
Ադրբերաջանական լրատվամիջոցները երեկվանից տարածում են Կոռնիձոր ուղևորված բեռնատարների լուսանկարներն ու տեսանյութերը՝ վրդովված մեկնաբանելով, թե իբր Արցախում ոչ մի հումանիտար ճգնաժամ չկա, հայերը շահարկում են, շանտաժ անում ու մանիպուլացնում։ Նրանք ամեն տեղ նշում են Ակնա-Ստեփանակերտ «բաց» ճանապարհի մասին՝ առաջարկելով բեռնափոխադրումներն ու տեղաշարժն իրականացնել այդ ճանապարհով։
