Եթե դա իրենց ռեյտինգ է ապահովում, թող այդպես ասեն, այսօր լրագրողների հետ զրույցում ասաց Գյումրու քաղաքապետ Վարդան Ղուկասյանը՝ անդրադառնալով ՔՊ–ականների պնդումներին, որ ինքը սկզբում չէր ուզում նշել Գյումրու օրը, բայց իրենց պնդումներից հետո միտքը փոխել է։
Անդրադառնալով փաստին, որ տոնը նշելուն աջակցում է Սամվել Կարապետյանը, Ղուկասյանն ասաց՝ եթե որևէ մեկը գումար ունի դնելու, որևէ բան ուզում է անել քաղաքում, իրենք պատրաստ են։
«Կտուրների խնդիր կա, մանկապարտեզների, սպորտ-դպրոցների, այնքան պրոբլեմ ունի Գյումրին, որը ուզում են, թող գումարներ բերեն։ Եթե ուզում են նմանատիպ բան անեն, թող գան, անեն։
Քաղաքի օրը իմ օրոք է արվել, ես եմ նշել Գյումրի քաղաքում, դա իմ ներդրած միջոցառումն է։ 13 տարի ես այդ միջոցառումը անցկացրել եմ»,- ասաց նա։
Անդրադառնալով իր և իր որդու դեմ հարուցված քրեական գործերին, Վարդան Ղուկասյանն ասաց՝ ինքը չի տեսել մի երկիր, որ այդքան հոգս պատճառի իր ժողովրդին։
«Ինձ կարո՞ղ եք ցույց տալ մի հատ երկիր աշխարհի տակ, որ այսքան դատավարական, դատական խնդիրներ առաջացնեն իրենց ժողովրդի նկատմամբ՝ բացի Հայաստանի Հանրապետությունից։ Մտածում եմ՝ ի՞նչն է պատճառը. հավանական է պատճառը նա է, որ ուզում են երկիրը դատարկեն։
Ամբողջ երկիրը դատարկվում է, այսինքն՝ մի հատ ժողովրդանպաստ, ազգանպաստ որոշում, որ հիմա տեսնենք… բացի ժողովրդին վատ բան անելուց, ես ոչ մի լավ բան չեմ տեսնում»,- նկատեց Ղուկասյանը։
Հարցին՝ արդյո՞ք Գյումրիում իր աշխատանքը խոչընդողող բաներ նկատում է, նա պատասխանեց.
«Միանշանակ։ Ես մոտավորապես 50 դիմում եմ գրել վարչապետին, քաղաքում լուրջ խնդիրներ կան։ Էն Արայիկ կա ինչ-որ բան, պատասխանում է, որ դիմումներն ուղարկեք մարզպետարան։ Պատկերացրեք՝ երկրորդ քաղաքի քաղաքապետը չի կարող վարչապետին գրություն ուղարկել։
Պինոչետի երկրում նման բան չի եղել։ Ինձ պատասխանել են, որ Դուք իրավունք չունեք, պետք է գրեք մարզպետարան, մարզպետարանը նոր ինձ ուղարկի։ Հլը պատկերացրեք, չինովնիկական դաստիարակությանը նայեք։ Իսկ մի ժամանակ հեծանիվով էին երթևեկում»,– ընդգծեց նա։
