2025 թվականի առանձնահատկությունն այն էր, որ լրագրողների և լրատվամիջոցների հանդեպ ճնշումների մոտ կեսը, եթե ոչ մեծամասնությունը և դատական գործերի մոտ կեսը պետական պաշտոնյաների և իշխանության ներկայացուցիչների կողմից են եղել։ Հայաստանում խոսքի ազատության վիճակի և լրագրողների ու ԶԼՄ-ների իրավունքների խախտումների վերաբերյալ2025-ի տարեկան զեկույցը ներկայացնելիս այսօր այս մասին ասաց Խոսքի ազատության պաշտպանության կոմիտեի նախագահ Աշոտ Մելիքյանը։
«Պետք է հանուն արդարության ասել, որ սովորաբար կոնֆլիկտները միակողմանի չեն լինում, և տարվա ընթացքում արձանագրել ենք դեպքեր, երբ լրագրողներն էին գործում մասնագիտական էթիկայի խախտումներով։ Կոնֆլիկտային այդ իրավիճակը հանգեցրել է նրան, որ 2025 թվականի ընթացքում ընդհանուր խախտումների քանակն ավելի է, քան 2024-ին։
Եթե թվերով խոսենք, ապա 3 կատեգորիաներով՝ ֆիզիակակն բռնություններ, այլ տեսակի ճնշումներ՝ վիրավորանքներ ու սպառնալիքներ, և տեղեկություն ստանալու ու տարածելու իրավունքի խախտում, անցած տարի արձանագրվել է 224 դեպք, մինչդեռ 2024-ին դրանք 208-ն էին։ 2025-ի 4 եռամսյակի արդյունքներով՝ ֆիզիկական բռնությունների քանակը 15-ն է, այլ տեսակի ճնշումների քանակը 108-ը, տեղեկություն ստանալու և տարածելու իրավունքի խախտումները 101-ն են։ Ֆիզիկական բռնությունները և՛ 2024-ին, և՛ 2025-ին նույն մակարդակի վրա են եղել՝ 15 դեպք»,- ասաց բանախոսը։
Ըստ Աշոտ Մելիքյանի՝ 2025-ին իշխանություն-ընդդիմություն, իշխանություն-եկեղեցի սրացումները, կալանավորումները ԶԼՄ-ները լուսաբանել են ծայրահեղ դիրքերից՝ համաձայն նրա, թե քաղաքական ինչ դիրքորոշում ունի տվյալ լրատվամիջոցը։
«ՑՑուն կերպով ևս մեկ անգամ արտահայտվեց մեր լրատվական դաշտի ծայրահեղ բևեռացվածությունը, մի բան, որ բոլոր զեկույցներում ընդգծվում է որպես բացասական գիծ։ Այս իրավիճակում քաղաքակիրթ բանավեճ, սուր հարցերին շուրջ կոնստրուկտիվ քննարկում գրեթե չի լինում։ Դա մտահոգչ է հատկապես գալիք ԱԺ ընտրությունների առումով, երբ կարծիքների բախումն է, որ ընտրողին թույլ կտա գիտակցված ընտրություն անել»,- ասաց ԽԱՊԿ նախագահը։
Աշոտ Մելիքյանը նկատեց՝ բնական է, որ կոնֆլիկտային իրավիճակները, ԶԼՄ-ներում վիրավորանքն ու զրպարտությունը հանգեցրել են մեծ թվով դատական գործերի, և 2025-ի ցուցանիշներն այդ համատեքստում հանադրելի են 2019-ի, հետպատերազմական 2021-ի տվյալների հետ։
