Agence France-Presse-ը՝ հղում անելով Ելիսեյան պալատի աղբյուրին հայտնում է․
Այցի ծրագիրը ենթադրում է հանդիպում Իսրայելի վարչապետ Բենյամին Նեթանյահուի հետ: Առաջիկա ուղևորության մասին այլ մանրամասներ չեն հաղորդվում: Մակրոնը հոկտեմբերի 20-ին լրագրողներին հայտարարել էր, որ տարածաշրջան կայցելի «առաջիկա օրերին կամ շաբաթներին», սակայն միայն այն դեպքում, եթե այդ այցը «թույլ տա օգտակար արդյունքների հասնել»:
Կիրակի երեկոյան Ֆրանսիայում Պաղեստինի դեսպան Հալա Աբու Հասիրան LCI հեռուստաալիքի եթերում հույս է հայտնել, որ այդ ուղևորության ընթացքում Ֆրանսիայի առաջնորդը «խաղաղության, լարվածության թուլացման և կրակի լիարժեք դադարեցման կոչ կտարածի»՝ Գազայի հատվածի խաղաղ բնակիչների շրջանում նոր զոհերից խուսափելու համար:
«Ես կցանկանայի, որ նա այցելեր և Պաղեստին, և Իսրայել»,- հայտարարել է նա՝ մանրամասնելով, որ խոսքը Հորդանան գետի արևմտյան ափին գտնվող տարածքների մասին է: Դեսպանը հավելել է, որ ակնկալում է Մակրոնի հանդիպումը Պաղեստինի նախագահ Մահմուդ Աբբասի հետ:
Ավելի վաղ Նեթանյահուն հեռախոսազրույցներ է ունեցել Մակրոնի և Նիդեռլանդների կառավարության ղեկավար Մարկ Ռյուտեի հետ: Զրույցի արդյունքներով նա հայտարարել է առաջնորդների՝ հոկտեմբերի 23-ին և 24-ին Իսրայել կատարելիք այցի մասին։
