«Թերլեմեզյան» ցուցասրահում բացվել է գեղանկարիչ Տարոն Շահինյանի «Նավարկություն» խորագրով ցուցահանդեսը։ Այն ընդգրկում է ֆիգուրատիվ և վերացական գեղանկարներ ու գրաֆիկաներ (2019-2024), որոնք էական դեր են խաղացել հեղինակի գեղարվեստական ձեռագրի ձևավորման գործում և ամփոփում են իրականության մասին նկարչի իմացումը։
Յուրաքանչյուր ստեղծագործություն արվեստագետի մտորումների, ինչ-որ տեղ նաև հարցադրումների տրանսֆորմացված անդրադարձն է։ Առանձին հարթություններում այն ներկայացվում է կարծես որպես թատերական գործողություն, ուր նավարկության ընթացքը պայմանավորված է կոնկրետ ժամանակի մեջ իրականության հանդեպ հեղինակի հուզական-գաղափարական վերաբերմունքով։ Հետաքրքիր է հետևել գեղանկարչի ձևամտածողության ընթացքին, կոմպոզիցիոն, մասնավորապես գունատարածական մեկնաբանմանը. ներդաշնակ, սահուն ռիթմեր, դեկորատիվ, տեղ-տեղ լոկալ գերիշխող գույներ, և այս ամենը միահյուսվում է տարածության ու գիտակցության մեջ։ Հորինվածքներն ամեն անգամ մի նոր դիտանկյունից թեման բացահայտելու, բեմադրելու փորձ են, որտեղ բուն ընթացքը կոնցեպտի առանցքն է՝ նավարկության նախապայմանը։
Առհասարակ, Տարոն Շահինյանի գործերին բնորոշ է թատերական բնույթը՝ շնորհիվ կերպարների, դրանց նշանային, էմոցիոնալ արտահայտության, իրավիճակների կամ երևույթների ըմբռնումների, սեփական հայացքով դրանց անձնավորման ու միջավայրի ինչ-որ տեղ նաև միստիկ պարզաբանման, և յուրատիպ էսթետիկայի, որը պայմանավորում է որոշակի վերաբերմունք իդեալի հանդեպ։ Նկարչի մտատիպարը դուրս է ժամանակային սահմանափակումից, մարմնացած զգացմունքներից, տպավորությունների բազմաթիվ դրվագներից, որոնք ինքնուրույն ձև ու բովանդակություն են ստանում՝ միևնույն մոտիվի տրամաբանական շղթայում։
Նկարաշարի հաջորդաբար ներկայացված ամեն կտավ առանձին պատում է կարևորի՝ կյանքի մասին։ Դրանք ժամանակի մեջ մշտապես գոյություն ունեցող մարդկային հարաբերությունների, ընկալումների տարբերության, բազմապիսի հայեցակետերի թանձրացումներն են, որոնք արվեստագետը զետեղում է իր պայմանական իրականության մեջ՝ որպես երազ։
Արվեստաբան՝ Ելենա Մովսեսյան
Լուսանկարները՝ Սպարտակ Ավետիսյանի
Ցուցահանդեսը կգործի՝ 21.11.2024 – 05.12.2024, ժ.10:00-16:00, Երևան, Արշակունյաց 39
