Չնայած Փաշինյանը հայտարարել է, որ տեղի են ունենալու արտահերթ ընտրություններ ու անգամ հստակ օր մատնանշել, այդուհանդերձ, մի շար հարցեր դեռ օդում կախված են։
«Ի՞նչ օրենսգրքով կանցկացվեն ընտրությունները՝ ռեյտինգային, թե 100 տոկոսանոց համամասնական, նոր օրենսգիրք կընդունվի, թե ոչ, ի՞նչ ուժեր կմասնակցեն, արդյոք կմնա Փաշինյանը վարչապետի ԺՊ, թե կլինի այն, ինչ ասաց օրինակ Լևոն Տեր Պետրոսյանը»,- «Փաստինֆո»-ի հետ զրույցում նկատեց քաղտեխնոլոգ Կարեն Քոչարյանը՝ նշելով, որ այս ամեն ինչից շատ բան է կախված եւ դրանք մեծ ազդեցություն են ունենալու մոտակա ընտրությունների վրա»։
Մոտ մեկ ամիս առաջ «Իմ քայլը» խմբակցությունը հայտարարել էր, թե հասարակության լայն շերտերի շրջանում չկա արտահերթ ընտրությունների պահանջ, իսկ այսօր Փաշինյանը հայտարարում է արտահերթ ընտրությունների կոնկրետ օր, ինչի հետեւանք էր սա՝ ընդդիմության փողոցային պայքարի, թե ներկուլիսային խաղերի հարցին ի պատասխան՝ քաղտեխնոլոգը նշեց, թե խորհրդարանական ուժերի պայմանավորվածությունն է։
«Պարզ է, որ Փաշինյանը որոշ առումով ուզում է դեմքը պահել՝ հասկանալով, որ, եթե երկրի ղեկավարը հարյուր մետրը քայլում է հազար ոստիկանի ուղեկցությամբ, ապա դրա ելքը միևնույնն է արտահերթ ընտրություններն են լինելու։
Ըստ նրա՝ իրադարձությունների զարգացման մի քանի սցենար կարող է լինել, այն է՝ Նիկոլ Փաշինյանը կարող է լքել երկիրը, կամ մնալ և ավելի դժոխք դարձնել Հայաստանը, կամ պարզապես անհետանալ։
«Այս պահին բոլոր սցենարներն էլ հավանական են։ Կարող եմ 10 սցենար թվարկել, թե դրանից որը՞ կիրականանա՝ ժամանակի ընթացքում և պրոցեսները ցույց կտան»,- ասաց բանախոսը։
Միաժամանակ նա համոզմունք հայտնեց, որ փողոցային պայքարը չի դադարելու, հակառակը՝ շարունակվելու է և չի բացառվում, որ ճնշումն ավելի մեծ լինի։ Իսկ բանակը լրջագույն դերակատարում է ունենալու, բայց ոչ բուն ընտրությունների վրա։
«Սովորաբար ուժային կառույցները միշտ լինում են այն ադմինիստրատիվ ռեսուրսի մեջ, որն ուենում է օրվա իշխանությունը։ Այսօրվա իշխանությունը ուժային ռեսուրս չի ունենալու»,- նշեց քաղտեխնոլոգը։
Իսկ որքանով է քաղաքական դաշտը պատրաստ արտահերթ ընտրություններին՝ հարցին ի պատասխան քաղտեխնոլոգը նկատեց, որ որոշ ուժեր պատրաստ են, որոշները՝ ոչ։ Քաղտեխնոլոգը հիշեցրեց, որ մի քանի ամիս է ականատեսն էինք, թե ինչպես են նոր կուսակցություններ ստեղծվում և պրոցեսը վաղ թե ուշ հանգեցնելու էր ընտրությունների և ուժերը ընտրություններին պատրաստվում էին։
«Չեմ կարող, թե նոր ուժերից որքանն են կենսունակ, որքանն են հերթական շոու հատվածն ապահովելու, այդ ամենը կրկին ժամանակը ցույց կտա»։
Քոչարյանը նաև անդրադարձավ ընդդիմության և վարչապետի պայմանավորվածություններին, հիշեցրեց, որ ընդդիմությունը տևական ժամանակ հայտարարում էր օր առաջ ընտրություն կազմակերպելու մասին, որովհետև այսպես չի կարող երկիրը գոյատևել։
«Փաստերը հետևյալն են՝ Էդմոն Մարուքյանը, Գագիկ Ծառուկյանը, ընդդիմության ներկայացուցիչներն արդեն ինչքան ժամանակ է ասում են, որ օր առաջ պետք լինեն արտահերթ ընտրություններ՝ ինչքանով է դա իրենց ձեռնտու և ինչի համար՝ հարցրեք իրենցից։ Ես հակված եմ հավատալ, այն ազնվությանը, որ այսպես շարունակվի՝ օր օրի երկիրը գլորվում է ոչ թե անդունդը, այլև սև անցքերը, որտեղից չեն վերադառնում, որովհետև մենք վաղուց արդեն անդունդում ենք, հիմա դեպի սև անց ենք գնում»,- եզրափակեց Կարեն Քոչարյանը։
Փաստինֆո
