Օգոստոի 8-ի փաստաթուղթն այլանդակություն է, անորոշություն՝ թողնված թշնամական կողմի մեկնաբանությանը։ Լրագրողների հետ զրույցում այսօր այս մասին ասաց ԱԺ «Հայաստան» խմբակցության պատգամավոր Արծվիկ Մինասյանը։
«Մենք առ այսօր չունենք բանակցությունների սղագրված տեքստը՝ երկու կողմից հաստատված։ Ունենք մի քանի փաստաթոըւղթ, որոնք Փաշինյանն իր ընկալումով ներկայացնում է»,- ասաց պատգամավորը։
Անդրադառնալով Նիկոլ Փաշինյանի այն հայտարարությանը, որն 2026 թվականին ժողովուրդն ընդդիմությանն ուղարկելու է քաղաքական աղբանոց՝ Մինասյանը նկատեց՝ նրա մանկական երազանքները փշրվելու են բյուրեղապակու նման։
«Եվ ես համոզված եմ, որ ինքն ու իր վայ քաղաքական թիմն են հայտնվելու ոչ միայն աղբանոցում, այլ՝ ՔԿՀ-ներում»,- ասաց նա։
Անդրադառնալով իշխանությունների խոստացած խաղաղությանը՝ Մինասյանը նշեց՝ Փաշինյանը կամ իր թիմի ցանկացած անդամ կարող են կանգնել ու ասել՝ «Տեսեք՝ Արցախում ինչ խաղաղություն է, ոչ սպանություն կա, ոչ կրակոցներ կան», բայց հայություն չկա։
Նրա խոսքով՝ այսօր ամենաշատ խաղաղություն ուզողը ազգային ընդդիմադիր հատվածն է, բայց այն պետք է հիմնված լինի քո ազգի հարգանքի վրա, ազգի իրավունքի վրա, այլ ոչ թե օրվա իշխանությունների ցանկությունների ու հայտարարությունների։
«Այս չորս տարի ամենօրյա ռեժիմով իշխանություններին դիմադրություն ցուցաբերվում է։ Այս ամենը Նիկոլ Փաշինյանի և օրվա իշխանությունների դավաճանական քայլերի հետևանքն է, որ խոստանում են մի բան, փաստի առաջ են կագնացնում և անում այլ բան։ Այսօր ժողովրդի ճնշող մեծամասնությունը մերժում է սրանց»,-հավելեց Մինասյանը։
Վերջում պատգամավորը շեշտեց՝ այսօր է Ադրբեջանն ուժեղ, որովհետև նրա դիմաց կանգնած է Նիկոլ Փաշինյանի նման հակառակորդ։
«Բայց վաղը, երբ լինի ազգային իշխանություն, այլ քաղաքականություն, կտեսնեք, թե Ալիևն ու Ադրբեջանն ինչ դիրքերում են»,- ամփոփեց Մինասյանը։
