Խաղաղությունը հասանելի և չափելի է այն դեպքում, երբ կողմերից որևէ մեկի համար անընդունելի է մյուսի նկատմամբ ճնշումներ գործադրելը։ Լրագրողների հետ զրույցում այսօր այս մասին ասաց ԱԺ «Հայաստան» խմբակցության պատգամավոր Արծվիկ Մինասյանը։
«Սա դասական ճշմարտություն է՝ բոլոր արդյունավետ որոշումների բանաձևը։ Եթե կողմերից մեկը կկատարի ընդդեմ մյուս կողմին քայլ, ինքը դրանից ավելի մեծ վնաս կստանա։ Միայն այս դեպքում է հնարավոր ունենալ կայուն և երկարատև խաղաղություն, իսկ այդպիսի որոշումը կարող է ի հայտ գալ, եթե մի քանի հարցի հստակ պատասխան կա. առաջին՝ այն հիմնված է արդարության չափանիշի վրա։ Արդարության չափանիշը տվյալ դեպքում ժողովուրդների ազատ ապրելու, նրանց ինքնորոշման իրավունքի հարգման, մշակութային կյանքով ապրելու երաշխավորված իրավունքն է։
Երբ Արցախը հայաթափված է, ո՞նց կարող է խաղաղություն իշխի։ Երկրորդ՝ ո՞նց կարող է խաղաղություն իշխել, երբ մի կողմն արդյունքի հասել է բռնության գործադրմամբ, սպառնալիքների հնչեցմամբ, դիմացի կողմին ամենօրյա նսեմացնելու վարքագծով և հետո խոսում է խաղաղության մասին։ Սա չի կարող խաղաղություն լինել։
Երրորդ՝ երբ չկա որևէ երաշխիք, որ կողմերից մեկի՝ շարունակելու դեպքում գործադրվի զսպման միջազգային համակարգ։ Այդ դեպքում ո՞վ կարող է այդ խաղաղությունը երաշխավորել։ Սա հո անձերի մակարդակի հարց չէ> ,- նշեց պատգամավորը։
Արծվիկ Մինասյանը շեշտեց՝ ՀՀ գործող իշխանություններն իրենց հետ ավեր են բերել, և նրանց պետք է փոխարինեն ազգային ծրագրերով ռեալ այլ ուժեր։
«Իմ խորին համոզմամբ ժողովրդի մեծամասնսւթյունը մերժում է այս իշխանությանը։ Այս իշխանությունն անպիտան, ավեր բերած և հեռացվող իշխանություն է»,- ասաց պատգամավորը։
