Սյունիքում զորքի հետքաշման հրամանը անձամբ ես եմ տվել, Վաղարշակ Հարությունյանը կատարել է ընդամենը. Փաշինյան

«Այսօր ադրբեջանցի սահմանապահները հայտնվել են Սյունիքում, որովհետև դեկտեմբերի 18-ին եղել է զորքերի հետքաշման հրաման, որը նախատեսված չի եղել նոյեմբերի 9-ի հայտարարությամբ: Զորքերի հետքաշման հրամանը եղել է բանավո՞ր, թե՞ գրավոր, ի՞նչ է այն մարդու անուն-ազգանունը, ով հնչեցրել է նման հրաման, արդյո՞ք ԱԽ նիստ տեղի է ունեցել՝ նման որոշում կայացնելուց առաջ»,- այսօր խորհրդարանում Նիկոլ Փաշինյանից հետաքրքրվեց «Հայաստան» խմբակցության պատգամավոր Աննա Գրիգորյանը:

Շարունակելով հարցը՝ պատգամավորը նշեց, որ վերջերս կառավարության ղեկավարը տարբեր բանակցությունների է մասնակցում, և օրինակ՝ ՌԴ ղեկավարի հետ հանդիպումից հետո ընդամենը հերթապահ հաղորդագրություն է տարածվում՝ պարզապես արձանագրելու, որ նման հանդիպում եղել է, այսինքն՝ բովանդակային առումով հայ ժողովուրդը որևէ մեսիջ չի ստացել.

«Կամ, օրինակ՝ Վրաստանի վարչապետը, ով հանդես է եկել այսպես ասած՝ միջնորդական առաքելություն կատարելու հանձնառությամբ, գնացել է Ադրբեջան, հետո եկել է Հայաստան, տարբեր քննարկումներ են եղել և մենք ընդամենը ֆիքսել ենք, որ նա կատարել է այդ քայլերը: Թե բովանդակային առումով ինչպիսի բանակցություններ են եղել, մեզ չի տեղեկացվում: Ես կխնդրեի, որ շատ հստակ ասվեր, թե բովանդակային ինչպիսի բանակցությունների մասին է խոսքը»:

Նիկոլ Փաշինյանը պատասխանեց. «Ես երբևէ հրաժարվե՞լ եմ, որ ես այդ որոշման պատասխանատուն եմ: Երբևէ նման բան եղե՞լ է: Գրավոր է եղել, թե բանավոր է եղել, նախարարը գրավոր է տվել, թե բանավոր՝ իրենց ընթացակարգերով են տալիս հրամանները: Քննարկում եղե՞լ է՝ այո, եղել է: ԱԽ նիստ չի եղել, բայց ԱԽ բոլոր անդամները, Սյունիքի մարզպետը, ԱԳ նախարարը, որ ասում էր՝ մենք տեղյակ չենք, նախարարի տեղակալը, որովհետև հետո ինքը գործուղման էր, մասնակցել են այդ քննարկմանը:

Այդ քննարկումը տեղի է ունեցել կառավարությունում, և որոշում է կայացվել: Ինչո՞ւ է կայացվել այդ որոշումը: Որոշումը կայացվել է հասցեագրելու համար ձեր՝ հիմա հնչեցվող քննադատությունները, կայացվել է՝ պատերազմից խուսափելու համար, որովհետև իմ համոզմունքը այն էր, որ եթե այդ որոշումը չկայացվեր, այնտեղ ռազմական գործողություններ էին սկսելու և իրոք Սյունիքում մենք ունենալու  էինք խնդիրներ: Ես ձեզ 100 անգամ ասել եմ՝ ինչի մենք ընդե՞ղ էինք կանգնած: Մենք դրանից տասնյակ կիլոմետրեր առաջ էինք կանգնած: Մենք եկել-հասել ենք, ցավոք սրտի, այդտեղ:

Այո, այդ որոշումը կայացվել է, և որոշումը կայացվել է նաև այն տրամաբանությամբ, որ բանակցային քննարկումների ընթացքում եղել է ըմբռնում, որ մենք 7 շրջաններ պետք է հանձնենք: Այդ տարածքները հանձնվել են 7 շրջանների մաս լինելու բերումով: Ինչո՞ւ են 7 շրջանների մաս. Ինչքան էլ դա ձեզ դուր չգա, այդ Վարչատարածքային բաժանման մասին օրենքով դա արձանագրված է:

Դա նորություն չէ: Դուք նախորդ անգամ հարց եք տվել՝ բանավոր պայմանավորվածությամբ նման բա՞ն է եղել, ես ասել եմ՝ մենք երբ ենք ասել, որ պայմանավորվածությունը եղել է բանավոր: Ասել եմ՝ իմ ուղերձում ես հայտարարություն եմ արել, որ եռակողմ թուղթ է պատրաստվում ստորագրելու՝ նախորդ օրերին, հետո ինքս հարց եմ տվել, կարող եք ասել՝ ստորագրվե՞ց այդ եռակողմ ֆորմատով թուղթը: Ո՛չ, եռակողմ ֆորմատով թուղթ չի ստորագրվել: Ինչո՞ւ ենք այսպես կիսատ-պռատ ասում՝ Հայաստանի շահերից ելնելով: Որովհետև կարծում ենք, որ այնտեղ ինֆորմացիաներ կան… մենք գաղտնիք չունենք: Ես եմ ասել, ես՝ իմ ուղերձում ասել եմ այդ ամեն ինչը՝ նախորդ օրերին: Հիմա ուզում եմ հասկանալ այդ բանը՝ թակարդ է լարում ընդդիմությունը մեզ համար, որ մենք գանք և հարցին պատասխանենք, և մի բան ընենց չասենք: Մենք ամեն ինչ ասում ենք»:

Աննա Գրիգորյանը ընդգծեց՝ հարցը տալիս է, որովհետև ՊՆ-ից իրեն պատասխանել են, որ լիազորություն չունեն ասել՝ այդ հրամանը եղել է բանավոր, թե գրավոր. «Մինչդեռ, դուք ձեր խոսքում ասում եք՝ էդ ի՞նչ մի խնդիր է, նախարարը հրաման է տվել, ինչ կապ ունի՝ բանավոր, թե գրավոր: Այդ դեպքում, խնդիրը ո՞րն է, ինչո՞ւ են ասում, որ լիազորություն չունեն՝ նման բան հայտարարելու: Այստեղ խնդիր է առաջանում: Այսինքն՝ դուք ուզում եք ասել, որ այն մարդու անուն-ազգանունը, ով հրաման է տվել՝ հետ քաշվելու, Վաղարշակ Հարությունյան է»:

Փաշինյանը պատասխանեց. «Ո՛չ, ես եմ տվել հետքաշվելու հրամանը, Վաղարշակ Հարությունյանը իրականացրել է այդ հրամանը»:

Աննա Գրիգորյանը ճշտող հարց տվեց. «Դուք, անմիջապես Զինված ուժերին հրաման եք տվել հետքաշմա՞ն: Եվ ԱԽ նիստի մասին խոսում եմ, որովհետև 1 մարդ միանձնյա անվտանգային հարցերով պայմանավորված նման որոշում չէր կարող կայացնել: Եվ ԱԽ նիստը հենց դրա համար է նախատեսված: Արդյո՞ք հնարավոր չէր գոնե ինչ-որ կերպ խուսափել, օրինակ՝ ստրատեգիական նշանակության ճանապարհները զիջելուց»:

Նիկոլ Փաշինյանը շեշտեց՝ այդ որոշումը կայացվել է ստրատեգիական նշանակության ճանապարհը առնվազն ինչ-որ ժամանակ չկորցնելու նկատառումով. «Ձեզ ինչո՞ւ է թվում, որ ամեն ինչ այդպես լավ պատկերացնում եք, մենք ոչինչ չենք պատկերացնում: Ձեզ ինչո՞ւ է թվում, որ դուք Սանասարի համար կռիվ եք տալիս, մենք առավոտից իրիկուն մտածել ենք՝ Սանասարն ու Բաղդասարը ոնց հանձնենք հակառակորդին:

Ինչի՞ ա թվում, էդ ինչի՞ց ա էդ տպավորությունը: Եվ էլի եմ ասում՝ այդ թակարդ հարցեր տալու անհրաժեշտություն չկա, ուղիղ հարց եք տալիս, ասում եմ՝ ոչ: Ձեզ թվում է, որ պետք է ասեմ՝ այո, Վաղարշակ Հարությունյանն է այդ հրամանը տվել: Ես եմ, պատասխանատուն ես եմ՝ անձամբ: Այո՛, միանձնյա ես եմ, բայց այդ որոշումը չեմ կայացրել այսպես՝ մեկ էլ վեր եմ կացել, ասել եմ՝ որոշում կայացնեմ: Դրան նախորդել են քննարկումներ՝ ամենատարբեր կազմերով, ԱԽ անդամներով, այդ առիթով ֆորմալ ԱԽ նիստ չի հրավիրվել:

ԱԽ-ն իր լիազորություններն ունի, բայց խորհրդակցություն է եղել, որին մասնակցել են պաշտպանության նախարարը, ԳՇ պետը, ԱԳ նախարարը, Սյունիքի մարզպետը, փոխվարչապետը, սահմանապահ զորքերի հրամանատարը, ԳՇ օպերատիվ վարչության պետը: Մի անգամ չի եղել՝ 5-6 անգամ եղել է քննարկում: Բանակցություններ են եղել, մեկնում է եղել, պայմանավորվածություններ են եղել, գրավոր պայմանավորվածություն է եղել: Բայց այդ, որ ասում եք՝ Սյունիք է եկել, ի վերջո, պետք է կողմնորոշվենք՝ մեր պատկերացրած Հայաստանը ո՞րն է, կամ մեր պատկերացրած չէ, ՀՀ-ն ո՞րն է: Պատգամավորն ասում է՝ Արցախի 72 տոկոսն օկուպացված է, իսկ ձեր ծրագրում կա՞ Շուշին և Հադրութը ազատագրելը, բա ինչի՞ չեք հարց տալիս՝ ձեր ծրագրում կա՞ Սանասարը դեօկուպացնելը»:

168.am