Հոկտեմբերի 27-ի ոճրագործությունը տևական ժամանակ ետ մղեց մեր երկրի զարգացումը: «Փաստինֆո»-ի հետ զրույցում ասել է «Հայաստան» խմբակցության պատգամավոր Աղվան Վարդանյանը՝ արձանագրելով, որ կատարված ողբերգությունից քիչ դասեր ենք քաղել՝ հաշվի առնելով հատկապես իշխող քաղաքական ուժի վարքագիծը:
Պատգամավորի դիտարկմամբ՝ «իշխող քաղաքական ուժը շարունակում է շահարկել հոկտեմբերի 27-ի հարցը՝ ելնելով իր նեղ խմբակային շահերից»:
Հարցին՝ թե միջադեպից 22 տարի անց ի՞նչն է խոչընդոտում գործի ամբողջական բացահայտմանը՝ հաշվի առնելով, որ բազմաթիվ անձինք կան այս գործով հարցաքննված, Աղվան Վարդանյանը պատասխանեց, որ հոկտեմբերի 27-ի գործը ամբողջական քննվել է, այդ օրը խորհրդարանում բոլոր ներկաները հարցաքննվել են, այդ թվում՝ ինքը.
«Գործից մի մաս է առանձնացված, բայց որքան էլ փորձեն շահարկել հարցը, այս 22 տարիների ընթացքում որևէ այլ հավանական վարկած առաջ չի քաշվել: Սա այնպիսի մի ոճրագործություն էր մեր պետության հանդեպ, որ ես չեմ բացառում՝ նույնիսկ տասնյակ տարիներ հետո հնարավոր չլինի պարզել՝ արդյո՞ք սա զուտ մի քանի ստահակների ոճրագործությունն էր, թե՞՝ կար այլ երկրների անվտանգության մարմինների կողմից ուղղորդված գործակալների մասնակցությունը: Սա շատ բարդ խնդիր է, բայց նրանք, ովքեր միանշանակ հասցեներ են նշում, դա անում են քաղաքական նեղ շահարկումների նպատակով»,-ասաց Աղվան Վարդանյանը և շեշտեց, որ այս հարվածն ուղղված էր մեր պետականությանը և հնարավոր է, որ նույնիսկ տասնյակ տարիներ հետո ինչ-որ ճշմարտություններ ի հայտ գան.
«Այն, ինչ գործի նյութերի մեջ կա, նման հիմք չի տալիս, կրկնում եմ՝ այս իշխանության շահարկումները զուտ քաղաքական շահարկման, նախկիններին մեղադրելու ցանկություն ունեն, տակն ուրիշ ոչինչ չկա»,-ասել է Աղվան Վարդանյանը:
8-րդ գումարման ԱԺ աշխատանքների մեկնարկին խորհրդարանում մի շարք անվտանգային միջոցառումներ էին ձեռնարկվել՝ պատճառաբանելով, թե այս խորհրդարանում հոկտեմբերի 27 է եղել, իսկ Արդարադատության նախարար Կարեն Անդրեասյանը համեմատականներ էր անցկացրել ներկա լրագրողների և հոկտեմբերի 27-ի ոճրագործության նախաձեռնող Նաիրի Հունանյանի միջև, որը ևս լրագրող էր.
Աղվան Վարդանյանի գնահատմամբ՝«սրանք հիվանդ մտքի արտահայտություններ են».
«Մեկ տարի առաջ, երբ ես միայնակ եկել էի ԱԺ, հետո իմացա, որ իշխանական պատգամավորները խառնվել են իրար, հետևում էին ինձ, վազում էին: Այսինքն՝ այս մարդիկ այնքան վախկոտ են իրենց տեսակով և սարսափած են իրենց կատարածներից, որ ներքին մի բան զգուշացնում է իրենց, բնականաբար, դրանք մարազմատիկ դատողություններ են»,-ասել է պատգամավորը:
