Սահմանադրական դատարանը հակասահմանադրական է ճանաչել «Բարձագույն կրթության և գիտության մասին» օրենքը, որը նախագահ Արմեն Սարգսյանը հրաժարվել էր ստորագրել և ուղարկել էր ՍԴ՝ Սահմանադրությանը համապատասխանությունը որոշելու։
Մասնավորապես, ՍԴ-ն հակասահմանադրական է ճանաչել օրենքի 27-րդ հոդվածի 3-րդ և 4-րդ մասերը, ինչը նշանակում է, որ օրենքի ամբողջ փաթեթը չի ստորագրվելու, քանի որ «ՍԴ մասին» սահմանադրական օրենքի 73-րդ հոդվածի 5-րդ մասի համաձայն` ՍԴ-ի կողմից Ազգային ժողովի ընդունած օրենքը կամ օրենքի վիճարկվող դրույթը Սահմանադրությանը հակասող ճանաչելու մասին որոշում ընդունվելու դեպքում օրենքը հանվում է շրջանառությունից:
Հակասահմանադրական ճանաչված կետերն են․
«3. Հանրային բուհի կառավարման խորհուրդը ձևավորվում է հետևյալ համամասնությամբ՝ 1) չորսին առաջադրում է բուհի ակադեմիական խորհուրդը, որոնց ներկայացվող պահանջները, առաջադրման և լիազորությունների դադարեցման կարգը սահմանվում են բուհի կանոնադրությամբ, 2) հինգին նշանակում է համապատասխան լիազոր մարմնի ղեկավարը։
4. Կառավարման խորհրդի բուհի չորս անդամներին սույն հոդվածի 6-րդ մասում սահմանված ժամկետում չառաջադրելու կամ չորսից պակաս առաջադրելու դեպքում կառավարման խորհրդի բուհի կողմից չառաջադրված անդամների համալրումն իրականացնում է համապատասխան լիազոր մարմնի ղեկավարը»։
Հիշեցնենք, որ այս օրենքը հարուցել էր մասնագիտական հանրության զայրույթը, մասնավորապես՝ դրանով խաթարվում էր բուհերի ինքնավարության սկզբունքը, քանի որ բուհերի հոգաբարձուների խորհրդի անդամների թիվը նվազեցվում հասցվում էր 9-ի, որից 5-ին նշանակելու էր կառավարությունը, ինչի հետևանքով բուհը զրկվում էր ռեկտոր ընտրելու եւ առհասարակ՝ ինքնուրույն որոշումներ կայացնելու հնարավորությունից։
Ամբողջական հոդվածը կարող եք կարդալ այս հասցեով՝ : https://hraparak.am/post/4e010c3203d2f939773e792c94bea1d0?fbclid=IwAR3g4PcQcOyybsNhvd-C6sD5OjOPAxA2c7Wl5B0TPVOGtZk1YXkFp5GYwrI
© 2008 – 2021 «Հրապարակ օրաթերթ»
