ՀԱՊԿ-ում մեր պայմանագրային պարտավորություններից բխող արձագանքը եղավ, եղավ անմիջապես, Երևանում հայ գործընկերոջ հետ համատեղ մամուլի ասուլիսի ժամանակ ասաց ՌԴ արտգործնախարար Սերգեյ Լավրովը՝ պատասխանելով այն հարցին, թե ինչու Ռուսաստանը չարձագանքեց և չկատարեց պայմանագրային պարտավորությունները , երբ 2022 թվականին Ադրբեջանը հարձակում գործեց ՀՀ ինքնիշխան տարածքի վրա՝ թիրախավորելով Ջերմուկ քաղաքը։
«Փաստահավաք առաքելությունը, ՀԱՊԿ-ի գլխավոր քարտուղարի ղեկավարությամբ, իրավիճակին ծանոթանալու համար միանգամից ուղևորվեց դեպքի վայր, արեց պրակտիկ առաջարկություններ, որ պետք է ՀԱՊԿ-ի դիտորդների առաքելություն ուղարկել իրավիճակը կայունացնելու համար։ Աշխատում էին ԱԳ և պաշտպանության նախարարները, խմբագրում առաջարկությունները, և մենք հասանք կոնսենսուսի, և առավոտյան տեքստը ներկայացվեց պետությունների կառավարությունների ղեկավարների քննարկմանը։
Բայց այդ իրավիճակում համաձայնեցված տեքստը տարբեր պատճառներով հայկական կողմն առաջարկեց հետաձգել, կոնսենսուս չեղավ։ Որոշ ժամանակ անց Պրահայում հայտարարվեց ԼՂ պատկանելության հարցում դիրքորոշումը, որը որոշվելու է 1991 թվականի Ալմա-Աթայի հռչակագրով, որի համաձայն ԼՂ ԻՄ-ը Ադրբեջանի մաս է։ Դա բավական անսպասելի էր»,- ասաց Լավրովը։
ՀՀ արտգործնախարար Արարատ Միրզոյանն իր հերթին նկատեց, որ Ջերմուկի դեպքերի վերաբերյալ ՀՀ դաշնակիցների գործողությունները գոհացուցիչ չէին։
