Միշտ ասել եմ` Հայաստանը ծայրահեղ հետամնաց երկրներից տարբերվում է միայն ատոմակայանի առկայությամբ: Այս մասին ֆեյսբուքյան իր էջում գրել է իրավաբանական գիտությունների թեկնածու, փաստաբան Արսեն Թավադյանը։
«Չլինի ատոմակայանը, մենք պայմանական Բուրկինա-Ֆասոյից ոչ մի բանով չենք տարբերվի: Դրա հետ մեկտեղ, այսօր ԱԷԿ-ի տնօրենը հայտարարում է, որ Ռիսկեր կան, որ հայկական ԱԷԿ-ի շահագործման ժամկետը չի երկարաձգվի:
Վերջերս ուժի մեջ մտած Եվրոպական միության և Հայաստանի միջև Համապարփակ և ընդլայնված գործընկերության համաձայնագրի 42-րդ հոդվածի 2-րդ մասի «g» կետի «ii» ենթակետում կա այսպիսի կարգավորում`
«համագործակցությունը պետք է ներառի՝ (ii) Մեծամորի ատոմային էլեկտրակայանի փակումն ու անվտանգ ապագործարկումը և այդ առումով ճանապարհային քարտեզի կամ 42-գործողությունների պլանի հնարավորինս շուտ ընդունումը՝ հաշվի առնելով նոր հզորությամբ դրա փոխարինման անհրաժեշտությունը՝ Հայաստանի Հանրապետության էներգետիկ անվտանգությունը և կայուն զարգացման պայմաններն ապահովելու նպատակով»:
Այսինքն, մենք մեր ձեռքով ստանձնում ենք ատոմակայանը փակելու միջազգային պարտավորություն` դրա դիմաց չստանալով իրականում ոչ մի բան: Այս համաձայնագիրը մեր տնտեսական բարեկեցության վրա վիճակագրական սխալանքի կարգի ազդեցություն է թողնելու:
Հ.Գ. Այս համաձայնագիրը ստորագրվել է 2017թ.-ին նախկին իշխանությունների կողմից, վստահ եմ զուտ PR նպատակներով, ուժի մեջ է մտել 2021թ.-ին, և նույն PR նպատակներում ներկա իշխանության կողմից ներկայացվում է որպես դրական ձեռքբերում:
Արդյունքում, հենց PR-ի, նեղ քաղաքական նպատակների համար էլ մեր բոլոր իշխանությունները մսխել և մսխում են այն քիչ ձեռքբերումները, որոնք դեռ մնացել են Խորհրդային Հայաստանից` մեզ տանելով լավագույն դեպքում դեպի 19-րդ դար»,- գրել է նա:
