Հայաստանի Սահմանադրական դատարանը մարտի 24-ին Հռոմի կանոնադրությունը ճանաչել է Սահմանադրությանը համապատասխանող:
Հայաստանը Հռոմի կանոնադրությունը ստորագրել է 1999 թվականի հոկտեմբերի 1-ին, սակայն փաստաթուղթը չի վավերացվել, քանի որ Հայաստանի Սահմանադրական դատարանը 2004 թվականի օգոստոսի 13-ին այն ճանաչել է Սահմանադրությանը հակասող:
ՀՀ կառավարությունը դատարան է դիմել 2022 թվականի դեկտեմբերի վերջին։ Այս որոշումը արդարադատության նախարար Գրիգոր Մինասյանը բացատրել է նրանով, որ Երևանը հնարավորություն կստանա ռազմական հանցագործությունների դեմ հայցեր ներկայացնել ՄԱԿ-ի Միջազգային քրեական դատարան: Կանոնադրության վավերացման անհրաժեշտությունը, նախարարի խոսքով, առաջացել է 2021 թվականի մայիսից սկսված և 2022 թվականի սեպտեմբերի 13-ին շարունակվող Հայաստանի դեմ Ադրբեջանի ագրեսիայի հետ կապված, որի արդյունքում օկուպացվել են Հայաստանի ինքնիշխան տարածքները։
Հռոմի կանոնադրությունը ՄԱԿ-ի Միջազգային քրեական դատարանի հիմնադիր փաստաթուղթն է, որտեղ քննվում են ծանր հանցագործությունները: Հռոմի կանոնադրության 5-րդ հոդվածը սահմանում է այդ հանցագործությունների շրջանակը՝ ցեղասպանություն, մարդկության դեմ հանցագործություններ, պատերազմական հանցագործություններ, ագրեսիա և այլն: Մարդու իրավունքների եվրոպական դատարանում Հայաստանի ներկայացուցիչ Եղիշե Կիրակոսյանը տեղեկացրել է, որ, վավերացնելով Հռոմի կանոնադրությունը, Հայաստանը հնարավորություն կստանա ՄԱԿ – ի Միջազգային քրեական դատարանում արդեն նոր կարգավիճակով բարձրացնել ադրբեջանական զինված ուժերի ռազմական հանցագործությունների և Հայաստանի ու նրա բնակչության դեմ Ադրբեջանի ագրեսիայի հարցը, ինչպես նաև կարող է քրեական պատասխանատվության ենթարկել ագրեսորին՝ անկախ այն բանից՝ նա միացել է այդ միջազգային փաստաթղթին, թե ոչ:
Ինչպես հայտնի է, Հաագայի Միջազգային քրեական դատարանը, որը նույնպես ստեղծվել է Հռոմի կանոնադրության հիման վրա, Ռուսաստանի նախագահ Վլադիմիր Պուտինի ձերբակալման օրդեր է տվել: Դատարանն այս որոշումը կայացրել է «Ուկրաինայի՝ Ռուսաստանի կողմից գրավված հատվածներից մարդկանց անօրինական արտաքսման» գործի քննության շրջանակում, ինչը, դատարանի կարծիքով, վնաս է հասցրել ուկրաինացի երեխաներին:
Այսօր Factor.am-ի հետ զրույցում ԱԺ պաշտպանության հարցերի մշտական հանձնաժողովի անդամ Գագիկ Մելքոնյանն ասել է՝ եթե Պուտինը գա Հայաստան, կկալանավորվի։
Եթե Հայաստանի Սահմանադրությունը Հռոմի կանոնադրությունը ճանաչել է Սահմանադրությանը համապատասխանող, Հաագայի միջազգային քրեական դատարանի որոշումներն էլ՝ օրինական, ուրեմն միանում է այդ որոշումներին։
Սակայն աշխարհաքաղաքական այս բարդ իրավիճակում պե՞տք է Հայաստանին ներքաշել Պուտինի դեմ ուղղված Միջազգային քրեական դատարանի գործողությունների վավերացման մեջ։
Հայաստանը, ի պատասխան նաև Ռուսաստանի դժգոհության, պաշտոնապես հայտարարել է, որ Հռոմի սատուտի վավերացումը որևէ կապ չունի ՌԴ նախագահ Պուտինի ձերբակալմամ վճռի հետ և նպատակ ունի պատասխանատվության ենթարկել Ադրբեջանին, բայց ի՞նչ են մտածում ՔՊ-ի պատասխանատուները, երբ այդ կուսակցության ներկայացուցիչը հայտարարում է, թե ավելի լավ է Պուտինը Հայաստան չգա, թե չէ կձերբակալվի։
Մեկը, ով ԱԺ պատգամավոր է, պաշտպանության հարցերի հանձնաժողովի անդամ, գեներալ, մի՞թե չի հասկանում, որ չմտածված, օդ տատանող հայտարարությունը կարող է վնասել Հայաստանի՝ առանց այն էլ չփայլող հեղինակությանը։
Մենք մեր խնդիրները չենք կարողանում լուծել, ուրիշի խնդի՞րն եք ուզում բարդել գլխներիս։ Պայթյունավտանգ այս իրավիճակում հնարավոր չէ՞ լեզուն պահել ատամների տակ ու անպատասխանատու հայտարարություններ չանել։
Նոր փորձա՞նք են ուզում բերել այս բազմաչարչար երկրի գլխին։
