Հովհաննավանքում տեղի ունեցած դեպքի վերաբերյալ (նկատի ունի այն միջադեպը, երբ պատարագի ժամանակ քաղաքացու բերանը փակելով՝ ուժով հեռացրեցին եկեղեցուց՝ խմբ.) ես բացատրություններ եմ խնդրել Պետական պահպանության ծառայությունից, և նրանք ասել են, որ որոշում է կայացվել այդ թվում՝ այդ քաղաքացու անվտանգությունն ապահովելու առումով, որովհետև նրա պահվածքը մարդկանց շրջանում կարող էր որոշակի ագրեսիա առաջացնել։ Այս մասին այսօր լրագրողների հետ զրույցում ասաց ՀՀ վարչապետ Նիկոլ Փաշինյանը։
«Դրա համար էլ այդ որոշումը կայացվեց»,- նշեց Փաշինյանը։
Անդրադառնալով առաջիկա ընտրություններում առաջադրվելու համար նախատեսված վճարների թեմային՝ նա նշեց՝ դա նորություն չէ։
«Այդպես միշտ տեղի է ունեցել ՔՊ-ի դեպքում։ Թեկնածուներին առաջադրվելիս վճար են իրականացնում, որովհետև մենք քարոզարշավ ենք իրականացնելու։ Բա ո՞վ է ֆինանսավորելու»,- հարց հնչեցրեց Փաշինյանը։
Ըստ նրա՝ իշխող կուսակցությունը պատրաստվում է դրամահավաք կազմակերպել, ինչպես դա արվել է նախկինում։
«Որևէ մեկը, եթե թեկնածություն է առաջադրում, պետք է ֆինանսական ներդրում ունենա»,- նշեց Փաշինյանը։
Նա հիշեցրեց, որ կուսակցության անդամները համամասնական նախընտրական ցուցակում ընդգրկվելու համար վճարում են 500 հազար դրամ, իսկ անկուսակցականները՝ 1.5 միլիոն դրամ, քանի որ կուսակցականները վճարում են նաև անդամավճարներ։
«Սա արվեց անհավասարություն չլինելու համար»,- հավելեց նա։
