Դատավորներ Մնացական Մարտիրոսյանի եւ Կարեն Ֆարխոյանի ինքնաբացարակների միջնորդությունները մերժվել են։ Այս մասին այսօր՝ օգոստոսի 18-ին, լրագրողների հետ զրույցում ասաց Գորիսի փոխհամայնքապետերի գործով պաշտպան Արմեն Մելքոնյանը։
Նշենք, որ այս պահին դատարանները քննում են Գորիսի փոխհամայնքապետերին կալանավորելու վերաբերյալ քննիչների միջնորդությունները։
«Ժամը 17։00-ին Մենուա Հովսեփյանի կալանքի հարցով շարունակությունն է, 18։30 Իրինա Յոլյանի կալանավորման քննարկման շարունակությունն է։ Հիմա դատարանը Սուսաննա Սարգսյանի գործով հեռացել է խորհրդակցական սենյակ։ 66 տարեկան կնոջ, երեք երեխաների մորը, երեք թոռնիկների տատիկին ոչ մի բանի համար ձերբակալել են ու կալանքի ներկայացրել։ Երկու օր է՝ հաց չի կերել։ Ակնկալում ենք, որ արդարացի որոշում կկայացնի։ Ամենակարեւորը, որ դատարանները գտնվեն իրենց բարձրության վրա եւ ճիշտ որոշում կայացնեն»,- նշեց նա։
Պաշտպանի խոսքով՝ Գորիսի փոխքաղաքապետների եւ նաեւ քաղաքապետ Առուշ Առուշանյանի նկատմամբ տրված ցուցմունքներն անհիմն են։
«Մի անձ չկա, որ ասի՝ այս մարդիկ այդ օգնությունը տվել են ինչ-որ շահ հետապնդելով։ Մարդիկ ասում են, որ ամիսներով ստամոքսի ցավ ունեին , դեղ չէին կարողանում գնել, դիմում են գրել, որ իրենց գումար տան՝ դեղ գնելու համար։ Բայց եթե այդ մարդը իր անվամբ թեկուզ մեկ «Մոսկվիչ» մեքենա ունենա գրանցած, ուրեմն՝ ինքը սոցիալապես անապահով չէ»,- ընդգծեց Արմեն Մելքոնյանը։
Արմեն Մելքոնյանը տեղեկացրեց, որ Իրինա Յոլյանի, Մենուա Հովսեփյանի եւ Գորիսի համայնքապետարանների երկու աշխատակիցների տանը խուզարկություններ են անցկացվել, սակայն որեւէ բան չեն առգրավել․ «Եթե բան գտած լինեին, հիմա համայն մարդկությունը իմացած կլիներ»։
News.am
