Մի շարք երկրներում սովից ավելի շատ մարդ կմահանա, քան կորոնավիրուսից
Միջազգային բարեգործական Oxfam կազմակերպությունը հայտարարել է, որ Կորոնավիրուսի համավարակի պատճառով մի շարք երկրներում ավելի շատ մարդ կմահանա սովից, քան հիվանդությունից: Կազմակերպությունն ուսումնասիրություններ է արել ու եզրահանգել, որ Եմենում, Կոնգոյում, Աֆղանստանում սովն ամեն օր սպառնում է 12 000 մարդու:
Անընդմեջ զինված հակամարտությունները, թույլ տնտեսություններն արդեն իսկ ճգնաժամի պատճառ են դարձել, այժմ բնակչության համար հավելյալ սպառնալիք է դարձել մարդասիրական օգնություն հասցնելու դժվարությունը։
Ջոնս Հոփկինսի համալսարանը տվյալներ է հրապարակել՝ աշխարհում Covid-19-ով հիվանդացածների թիվը գերազանցել է 12 միլիոնը, մահացել է մոտ 550 000 մարդ: Երկու ցուցանիշներով առաջատարը մնում է Միացյալ Նահանգները՝ համապատասխանաբար ավելի քան 3 միլիոն և 132 000 մարդ: Վարակվածների և մահացածների թվով երկրորդ տեղում Բրազիլիան է: Մեծ Բրիտանիան Եվրոպայում ամենաշատ տուժած երկիրն է՝ զբաղեցնելով 7-րդ տեղը՝ 288 500 վարակված, իսկ մահացածների թվով 3-րդ տեղում է՝ 44 600:
