«Մեր ձևով» շարժումն իրենից ներկայացնում է ընդդիմադիր դաշտում ռեալ առաջին դիրքում գտնվող ուժ և ներկայացնում է լուրջ այլընտրանքային հատված իշխանության նկատմամբ, այսօր տեղի ունեցած մամուլի ասուլիսի ժամանակ հայտարարեց Միասնական ազգային սահմանադրական կուսակցության նախագահ Հովիկ Աղազարյանը։
«Ի՞նչ կարող է տեղի ունենալ. հավանական երկու սցենար կա։ Առաջին սցենարը, որը քիչ հավանական է, սակայն կարող է տեղի ունենալ, հետևյալն է. Նիկոլ Փաշինյանն իշխանությունը փոխանցում է Սամվել Կարապետյանին։ Այդ դեպքում Նիկոլ Փաշինյանը կդառնա մարդկության պատմության մեջ բոլոր ժամանակների, բոլոր պետությունների ամենահզոր, ուժեղ քաղաքական-պետական գործիչներից մեկը։ Նորրից եմ ասում՝ սա քիչ հավանական տարբերակն է՝ բայց ոչ զրոյական արժեքով։
Երկրորդ տարբերակ՝ Նիկոլ Փաշինյանն սպասելու է որոշ ժամանակ և տեսնի, թե «Մեր ձևով» շարժման շուրջ ոնց է կոնսոլիդացվում հասարակությունը, ընդդիմադիր ընտրազանգվածը, և անհրաժեշտ քայլ կատարի՝ այդ մաքսիմալ կոնսոլիդացումից մի պահ առաջ կատարի անհրաժեշտ քայլը։ Իսկ անհրաժեշտ քայլը ո՞րն է. կա՛մ եթե համընկնում է կուսակցություններին կամ ուժերին՝ որպես ընտրարշավին մասնակցության իրավունք ստանալու գրանցման պահին՝ չգրանցեն, կա՛մ նույնիսկ մայիսի 15-20-ին դուրս հանեն քաղաքակն պայքարից, և «Մեր ձևով» շարժումը չհասնի հունիսի 7-ին։
Մեկ տարբերակ՝ եթե «Մեր ձևով»-ի պիկը կլինի առաջիկա մեկ ամսվա ընթացքում, ապա չեն գրանցի ուղղակի, իսկ եթե այդ պիկը չզգացվի իշխանական շրջանակների, հատուկ ծառայությունների կողմից, և այդ պիկն զգացվի մայիսի 10-ին, ապա մայիսի 15-20-ին՝ այսինքն՝ ընտրություններից մի քանի օր առաջ ընտրապայքարից դուրս կհանեն այդ ուժին։ Կարող է գրանցեն և գրանցումից էլ հանեն։
Այս դեպքում ի՞նչ տեղի կունենա. ժողովրդի մոտ կառաջանա ապատիայի ընկալում, իշխանությունների ամենազորությունը կամրապնդվի, և ընտրության կգա քիչ թվով քաղաքացի։ Նիկոլ Փաշինյանը, ՔՊ-ն կհավաքեն այն զանգվածը, որն այսօր ունեն, և մոտավորապես 70 տոկոս ձայներ հավաքելով՝ ՔՊ-ն կդառնա բացարձակ իշխանություն»,- ասաց Հովիկ Աղազարյանը։
Նման սցենար թույլ չտալու համար, պատգամավորի համոզմամբ, ընդդիմադիր հատվածը պետք է ձևավորի ճակատ։
«Իրենցից յուրաքանչյուրն ունի իր ցուցակը, բայց միասին են հանդես գալիս իշխանափոխության իմաստով։ Նպատակը ո՞րն է։ Հիմա պատկերացրեք՝ «Մեր ձևով» շարժումը գտնվում է այդ ճակատի մեջ և մայիսի 15-ին այնքան թափ է հավաքում, որ իշխանություններն իրեն դուրս են հանում ընտրապայքարից։
«Մեր ձևով»-ը հայտարարում է ՝ սիրելի՛ համակիրներ, նրանք, ովքեր պատրաստվում էին ձայն տալ մեզ, ձայն տվեք ճակատում գտնվող ցանկացած ուժի, որովհետև, եթե ճակատն ԱԺ-ում հաջողության է հասնում, մենք մաս ենք կազմելու այդ ժամանակավոր կառավարության։ Այսինքն՝ «Մեր ձևով» շարժումը հնարավորություն է ունենում ԱԺ ընտրություններից մի քանի ամիս անց գալ իշխանության»,- ասաց Հովիկ Աղազարյանը։
