Մենք խորհրդարան չենք գնա այս իշխանությունների օրակարգով, մեր և նրանց օրակարգերն այլևս հատման կետեր չունեն․ այսօր հրավիրված մամուլի ասուլիսում հայտարարեց ՀՅԴ Հայաստանի ԳՄ ներկայացուցիչ, «Դիմադրություն» շարժման առաջնորդներից Իշխան Սաղաթելյանը։
«Նրանց օրակարգը Հայաստանի և Արցախի անվտանգության շահերի հետ որևէ առնչություն չունի։ Մենք չենք պատրաստվում գնալ խորհրդարան, առկա քաղաքական ճգնաժամը հաղթահարել այդ ճանապարհով՝ սպասարկելով նրանց օրակարգը։ Մենք խորհրդարան գնալու ենք բացառապես մեր օրակարգով»,- նշեց նա՝ որպես օրինակ բերելով հունիսի 3-ին ժողովրդի հետ ձևավորած օրակարգը, որով էլ գնացել էին խորհրդարան՝ ընդունելու համար հայտարարություն, որ Արցախը երբեք չի լինի Ադրբեջանի կազմում։
Լրագրողի դիտարկմանը, որ դա, սակայն, արդյունք չտվեց, Սաղաթելյանը պատասխանեց՝ հունիսի 3-ի փաստաթղթի արդյունավետությունն այն էր, որ հանրության այն հատվածը, որը դեռևս կասկածներ ուներ, որ ՀՀ իշխանությունները դավաճան են, համոզվեց դրանում՝ ՔՊ խմբակցությունը բոյկոտեց նիստը։
