Անցած 5 օրերի դատաքննությունն աննադեպ էր ոչ միայ դիմողների ուժերի քանակով, այլև ներկայացված ապացույցների, փաստերի ծավալի առումով, ԱԺ հերթական ընտրությունների արդյունքները վիճարկող 7 քաղաքական ուժերի դիմումների հիման վրա միացված գործի քննության եզրափակիչ ելույթում հայտարարեց «Միասնության թևեր» կուսակցության ներկայացուցիչ Լիպարիտ Դրմեյանը։
Ըստ նրա՝ մի կողմից 7 ուժեր ներկայացնում էին ընտրախախտումների վերաբերյալ հիմնավոր, երբեմն չհերքվող փաստեր, մյուս կողմից պետական իշխանության մարմինները կասկածի տակ էին դնում յուրաքանչյուր ներկայացված փաստ։
«Բոլոր խախտումների հանրագումարը ողջամիտ կասկածից վեր հաստատում է մեկ փաստ՝ խախտումները կարող էին ազդել ընտրության արդյունքների վրա։
Եթե լսենք հակառակը պնդող կողմերին, որոնք պնդում են, թե բավարար չեն եղել խախտումները, որպեսզի հաղթահարեն անվավեր ճանաչելու շեմը, ապա հարց է առաջանում՝ քանի՞ հատ խախտում պետք է լիներ, որպեսզի ազդեցություն ունենար արդյունքների վրա։ Կա արդյոք որևէ մեկն այս դահլիճում, որ հնչեցնի թիվ, թե քանի խախտման դեպքում կունենանք ազդեցության արդյունքների վրա։ Չկա և չի կարող լինել։
Այս դահլճում ներկայացված փաստերն ու ապացույցները չեն հերքվել. դրանց վերաբերյալ ներկայացվել են բացատրություն կամ պարզաբանում, որը չի վերացնում փաստի գոյությունը։ Ներկայացված փաստերն ու ապացույցները վկայում են մեկ բանի մասին՝ հունիսի 7-ի ԱԺ ընտրությունները չեն անցել հավասարության և ազատության պայմաններում։ Այդ երկու սկզբունքները խախտվել են պարբերաբար, համակարգված ձևով։ Մեզ համար պարզ է դարձել մեկ բան՝ եթե ցանկանում ես հաղթել ընտրություններում, ապա պետք է անես այն բոլոր քայլերը, որոնք արգելված են Ընտրական օրենսգրքով։
Սահմանադրական դատարան, ձեր կայացրած որոշումը կարևոր է Հայաստանի ամբողջ ժողովրդավարական զարգացան համար։ Այդ որոշում է, որ կա՛մ վերջ կդնի չփարատված կասկածներին, կա՛մ էլ ավելի կխորացնի հասարակության մեջ արդեն 8 տարի ձևավորվող բևեռացումը»,- ասաց Լիպարիտ Դրմեյանը։
Հիշեցնենք՝ «Միասնության թևեր» կուսակցությունը ՍԴ–ից պահանջում է հունիսի 7-ին կայացած ընտրությունների արդյունքներն անվավեր ճանաչել և վերաքվեարկություն նշանակել։
