«Հերթական զիջումը կարող է լինել անկլավների վերադարձը». Այս մասին այսօր հրավիրված քննարկմանը հայտարարել է ԱԺ անկախ պատգամավոր Աննա Գրիգորյանն՝ անդրադառնալով Հայաստանի կողմից սպասվող զիջումներին։ Պատգամավորը հայտնեց, որ երբ այս իշխանությունները հայտարարում են, թե գնում են ապաշրջափակման, իրենց գործողություններով Հայաստանը դնում են շրջափակման մեջ։
«Հարավում դեպի Իրան տանող ճանապարհը արդեն անցել է Ադրբեջանին և մի քանի տարի հետո կարող են ասել՝ այստեղով երթևեկությունն անթույլատրելի է»։
Պատգամավորը նկատեց՝ եթե Արարատից Տիգրանաշենը, Տավուշից մի քանի գյուղեր հանձնվեն՝ կստացվի, որ Ադրբեջանի վերահսկողության տակ է անցնելու դեպի Վրաստան տանող և Հայաստանի հյուսիսից հարավ տանող ճանապարհը կդրվի բլոկադայի տակ։
«Ես էլ չեմ խոսում հնարավոր խաղաղության պայմանագրի մասին, որի տակ ենթադրվում է Արցախը ճանաչել Ադրբեջանի տարածքային ամբողջականության մաս՝ իր սահմաններով, որն ուղղակի անթույլատրելի է։ Այս գործըթնացը հավանաբար ուզում էին սկսել դեմիլիտացիայի և դեմարկացիայի մասին համաձայանագրի ընդունմամբ և այնուհետև շարունակել, բայց որը կասեցվեց ընդդիմության ակտիվ պայքարի ջանքերի արդյունքում»,- ասաց նա։
Պատգամավորը նշեց, որ խաղաղության դարաշրջանի մասին այս իշխանությունները մեկ անգամ չէ, որ խոսել են, բայց դա կեղծ խաղաղություն է։
«Դու չես կարող խաղաղ ապրել մարդկանց հետ, որոնք ամեն օր խոսում են քեզ ոչնչացնելու մասին, դու չես կարող խաղաղության քարոզ անել, երբ թշնամի երկրի ղեկավարը խոսում է, որ Զանգեզուրը, Սևանը, Երևանը իր հողերն են և նրանք վերադառնալու են։
Մեր բանակաշինության մասին խոսելու փոխարեն, խոսում ենք զինվորների ծառայության ժամկետի կրճատման մասին։ Սրանք կործանարար հետևանքներ են ունենալու ՀՀ-ի համար»,– ասաց Գրիգորյանը։
Աղբյուր` Փաստինֆո
