PR արեք հողի վրա ձեր արած գործն ու քաղաքական առաջարկը, ոչ թե ձեր գործի ու առաջարկի ընկալումներն ու վստահելիությունը. Վլադիմիր Մրտիրոսյան

Եթե հավատանք բոլոր հարցումներին, ապա Հայաստանում միաժամանակ հաղթում են գրեթե բոլորը։ Այս տեմպերով ամենամեծ վարկանիշային կորուստը կարող է կրել ոչ թե որևէ քաղաքական ուժ, այլ «սոցիոլոգիական հարցում» հասկացությունը։

Սոցիոլոգիական հարցումները արդեն դադարում են լինել հասարակական տրամադրությունների չափման գործիք և վերածվել են քաղաքական PR-ի՝ ոչ թե թիրախային աշխատանքի վեր հանման գործիքի և դարձել են բազմակի օգտագործման աքսեսուարներ։

Մի հարցում հրապարակվում է՝ ապացուցելու համար, որ իշխանությունը «կայուն առաջատար» է։Մյուսը՝ ցույց տալու համար, որ իշխանությունը «պատմական անկում» է ապրում։ Երրորդը՝ ապացուցելու համար, որ նոր ուժը սրընթաց աճում է:

Կրկին, եթե հավատանք բոլոր հարցումներին, ապա Հայաստանում միաժամանակ հաղթում են գրեթե բոլորը։ Սա PR-ի դասական պարադոքսն է, երբ գործիքը չափազանց շատ ես օգտագործում, այն սկսում է աշխատել հակառակ ուղղությամբ և վնասել: Հետո սկսում ես ստիպված պայքարել վնասի չեզոքացման ուղղությամբ։

Այսօր արդեն սոցիոլոգիական հարցումների հրապարակումները հաճախ ավելի շատ դեզօրիենտացնում են ընտրողին, քան օգնում որևէ ուժի։ Ընտրողը ոչ թե համոզվում է, այլ սկսում է կասկածել բոլոր հարցում հրապարակողներին, պատվիրատուներին և մեկնաբանողներին։

Արդյունքում ստացվում է մի քաղաքական իրավիճակ, երբ բոլորը փորձում են մրցակցել ոչ թե քաղաքական առաջարկներով, այլ իրենց սոց. հարցումների տվյալներով , որոնց ճշտության մեջ համոզված են, բայց այդ ընթացքում կորչում է հենց հարցումների նկատմամբ վստահությունը, հետևաբար նաև դրա PR էֆեկտը:

P.S. Խնդրում եմ, PR արեք հողի վրա ձեր արած գործն ու քաղաքական առաջարկը, ոչ թե ձեր գործի ու առաջարկի ընկալումներն ու վստահելիությունը: Դա նույնն է, որ անդադար խոսես գործից, գործն անելու փոխարեն:

Վլադիմիր Մարտիրոսյան, քաղաքագետ