Սուրեն Պապիկյա´ն, հանրությունը սպասում է, ժամանակը գնաց. Դավիթ Անանյան

Մի քանի օր առաջ Արման Թաթոյանը փաստերով ցույց տվեց, թե ինչպես են ադրբեջանական զինված ուժերը 2025 թվականի օգոստոսին առաջ բերել և ամրացրել իրենց հենակետերը Հայաստանի Հանրապետության ինքնիշխան տարածքում։

Իշխանական շրջանակներում սկսվեց աղմուկը։ ՀՀ պաշտպանության նախարարը Ազգային ժողովի ամբիոնից հայտարարեց՝ «սուտ է»։

Ոչ հակափաստարկ ներկայացրեց, ոչ տվյալներ հրապարակեց։ Պարզապես հնչեցրեց մեղադրանք:

Երեկ անկախ լրագրողների հետաքննությունը փաստացի հաստատեց ներկայացված փաստերը։

Այս իրավիճակում հարցը այլևս ոչ թե Թաթոյանի մասին է։ Հարցը այն մասին է, թե ինչպես են պետության համար պատասխանատուներն ու պետության անունից հանդես եկողները վերաբերվում ճշմարտությանը։

Որովհետև երբ երկրի պաշտպանության նախարարը խորհրդարանի ամբիոնից իրականությունը հայտարարում է սուտ, ապա նա պարտավոր է ներողություն խնդրել ժողովրդից։

Իսկ եթե ապրեինք իրավական պետությունում, դրանից հետո պետք է հետևեր նաև հրաժարականը։

Որովհետև սահմանները նախ քարտեզների վրա չեն անհետանում։ Նրանք անհետանում են այն պահին, երբ իրականությունից կտրված պաշտոնավորները սկսում են հերքել իրականությունը։

Իսկ իրականությունը, որքան էլ այն փորձեն անվանել «սուտ», միևնույն է մի օր գալիս և կանգնում է մեր դռան առաջ՝ արդեն որպես կորցրած տարածք։

Սուրեն Պապիկյա´ն, հանրությունը սպասում է, ժամանակը գնաց:

Դավիթ Անանյան, պետական գործիչ, տնտեսագետ