«ՀՀ իշխանությունն իր պատասխանը տվել է, որ իրենք կարող են այսքանը անել, գումար տրամադրել։ Շնորհակալ եմ իրենցից»,- Երևան-Ստեփանակերտ ուղիղ տեսակամրջի ժամանակ ասաց Արցախի Հանրապետության պետնախարար Ռուբեն Վարդանյանը։
Ինչպես հայտնի է, հունվարի 10-ին՝ ասուլիսի ժամանակ, Նիկոլ Փաշինյանն ասաց, որ Հայաստանը պետք է զբաղվի իր հարցերով, իսկ Լեռնային Ղարաբաղի ժողովրդի ներկայացուցիչները՝ ԼՂ հարցերով։ Փաշինյանն ուղիղ խոսքով ասաց, որ հետ է կանգնել Արցախի ցանկացած խնդրից և առավելագույն օգնությունը դրամական աջակցությունն է, որ տրամադրում է Հայաստանն Արցախին։
Փաշինյանն ու նրա կառավարությունը մեկ անգամ չէ, որ մեղադրել են ռուս խաղաղպահներին՝ իրենց պարտականությունները չկատարելու մեջ։
«Ես ուղղակի չեմ ուզենա մեկնաբանել քաղաքական գործչի խոսքերը, ուղղակի կառաջարկեմ գալ, մեր կողքին կանգնել ու տեսնել, թե ինչքան մեծ դեր է խաղում ռուս խաղաղապահն այսօրվա իրավիճակում այստեղ։ Ինձ թվում է՝ խոսքերն ուղղակի արժեքը կորցրել են։ Ռուս խաղաղապահների մոտ, իսկապես, ծանր իրավիճակ է։ Իհարկե, մենք կուզենայինք, որ ռուս խաղաղապահների մոտ ավելի հստակ լինի իրենց մանդատը, ավելի երկարաժամկետ և ավելի խոշոր անձնակազմ լինի այստեղ ներգրավված։ Իրենք չլինեին՝, հիմա մենք կարող է շատ ավելի դժվար իրավիճակում լինեինք։
Մենք այստեղ տեսնում ենք իրենց իրավիճակը և ամեն կերպ համագործակցում ենք այդ իրավիճակից դուրս գալու բանաձևը գտնելու համար։ Դա միակ ճանապարհն է։ Քննադատելով ոչ մի բանի չենք հասնի, միայն կօգնենք Ադրբեջանին։ Ռուս խաղաղապահները պետք է մնան այստեղ տասնյակ տարիներով և ապահովեն անվտանգությունը», – ասաց Ռուբեն Վարդանյանը։
