«Այլընտրանք» ՀԿ-ի ղեկավար, «Հայաստան» դաշինքի անդամ Նարեկ Մանթաշյանը 20 մլն դրամ գրավի դիմաց ազատ կարձակվի:
Մինչ դատարանը խորհրդակցական սենյակ կհեռանար, Նարեկ Մանթաշյանը նշեց, որ գտնվում է քաղաքական պատանդառության մեջ և դատարանից միայն արդարադատություն է ակնկալում:
«Հատուկ ուզում եմ ընդգծեմ, որ իմ առողջական վիճակի հետ ցանկացած խնդիր որևէ կերպ չդիտարկվի որպես խղճահարություն առաջացնելու միջոց, ես դատարարանից պահանջում եմ միայն արդարադատություն»,-նշեց նա:
Երևանի ընդհանուր իրավասության դատարանի Կենտրոնի նստավայրում, դատավոր Կարեն Ֆարխոյանի նախագահությամբ այսօր քննում էր Նարեկ Մանթաշյանի խափանման միջոցը փոխելու նրա պաշտպան Ալեքսանդր Կոչուբաևի ներկայացրած միջնորդությունը:
Հիշեցնենք, որ Նարեկ Մանթաշյանին մեղադրանք է առաջադրվել ՀՀ ՔՕ 225-րդ հոդվածի 1 -ին եւ 2-րդ մասերով՝ այն է զանգվածային անկարգություններ կազմակերպելը եւ դրանց ժամանակ բռնություն գործադրելը ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը։ Լրատվամիջոցներում այն ստացել է «#դրոշի_գործ» անվանումը։
Մանթաշյանն իրեն առաջադրված մեղադրանքը չի ընդունում եւ այն որակում է որպես քաղաքական հետապնդում իր նկատմամբ։
Նշենք, որ մի քանի ամիս է՝ նա գտնվում է կալանքի տակ։ Նրա պաշտպան Ալեքսանդր Կոչուբաեւ պարբերաբար հանդես է գալիս հայտարարություններով այն մասին, որ իր պաշտպանյալի առողջական վիճակը շարունակում է մնալ ծանր, շաքարային դիաբետը հանգեցրել է նրա կենսական կարեւոր օրգանների ախտահարմանը. «Ինսուլինային կախվածության չափաբաժինը հասնում է օրական 100 միլիգրամի»։
Ալեքսանդր Կոչուբաեւի խոսքով՝ 60 միլիգրամ ինսուլինային կախվածությունն արդեն իսկ կալանավորման պայմանների հետ անհամատեղելի է դիտարկվում։
