«Քաղաքապետարանը հստակ ասել է՝ բոլոր ծակերը կվերականգնվեն, եթե դրա կարիքը կա»,- Կառավարության այսօրվա նիստից հետո՝ լրագրողների հետ ճեպազրույցում, ասաց ԿԳՄՍ նախարար Վահրամ Դումանյանը։
Նա դժգոհել է՝ ավելի լուջ, բովանդակային հարցեր տվեք։
«Այդ անցքերի մասով աշխատանքները կատարվել են քաղաքապետարանի պատվերով, և պարոն Ավինյանն էլ է ասել։ Խնդրում եմ, եկեք այսքանով ամփոփենք։ Ես փորձագետ չեմ, ես լսել եմ տարբեր կարծիքներ, ճարտարապետներ կան, որ ասում են՝ դա ընդհանրապես խնդիր չի։ Մենք հարյուրամյա պատմամշակութային արժեքներ ենք վերականգնում։ Մի անցքը դարձրել եք մի անհաղթահարելի խնդիր։ 6000 անցք կա, 6000-ն առանձին-առանձին կվերականգնվի»։
Ինչո՞ւ Երևանի քաղաքապետարանը նախապես չի դիմել ԿԳՄՍՆ-ին, որպեսզի համապատասխան հանձնաժողովը որոշի՝ թույլատրվո՞ւմ է թամանայանական շենքի վրա հազարավոր անցքեր, անել, խոյակների մեջ խոռոչներ բացել։
Դումանյանը պատասխանեց. «Որպես ժամանակավոր կառույց՝ այդ ամենը չի դիտարկվել գիտամեթոդական նիստի օրակարգում։ Եթե դա լիներ մշտական կառույց, պետք է նախագիծ լիներ, ստանար գիտամեթոդականի հավանությունը։ Քաղաքապետարանը բանավոր է դիմել մեզ, գիտամեթոդականից էլ բանավոր ասել են՝ դե եթե ժամանակավոր է, ուրեմն…
Եթե ես լինեի, միգուցե այլ լուծում տայի, բայց եկեք չքննարկենք, թե ինչ աշխատանք է կատարվել։ Ես վստահում եմ քաղաքապետին, որն ասել է՝ եթե ինչ-որ բան վնասել են, իրենք դա կվերականգնեն»։
