Կոչ ենք անում Հայաստանին անհապաղ միջոցներ ձեռնարկել, ռուս խաղաղապահներրին միջազգային մանդատով օժտելու համար դիմել ՄԱԿ-ին․ Արցախի Աժ
Արցախի ԱԺ-ն այսօր արտահերթ նիստ է գումարել, քննարկել իրավիճակից դուրս գալու ելքերը։
Արցախի պատգամավորներն արտահերթ նիստում ուղերձ են հղել՝ ՄԱԿ-ի կողմից Արցախում խաղաղություն պարտադրելու համար պատշաճ միջոցներ ձեռնարկելու ուղղությամբ։
Ուղերձում մասնավորապես ասված է․
«Արցախում տեղակայած ռուսական խաղաղապահ զորախումբն օժտված չէ միջազգային մանդատով, հանգամանք, որը կանաչ լույս է վառում Ադրբեջանի կողմից եռակողմ հայտարարության խախտումներին և տարածաշրջանային անվտանգության և կայունության վտանգման համար։
Արցախի ԱԺ-ն կոչ է անում Հայաստանին՝ անհապաղ միջոցներ ձեռնարկել ռուս խաղաղապահներրի առաքելությանը միջազգային մանդատով օժտելու համար՝ դիմել ՄԱԿ-ի անվտանգության խորհրդին ու գլխավոր ասամբլեային։
Կոչ ենք անում Հայաստանին՝ դիմել ՄԱԿ-ին՝ առաջարկելով պատշաճ քայլեր կատարել տարածաշրջանում խաղաղության և անվտանգության պահպանման համար՝ ՄԱԿ-ի կանոնադրության համաձայն՝ պետք է իմպերատիվ բանաձև ընդունվի, որն Արցախում խաղաղություն կպարտադրի։ Արցախի Հանրապետությունը հանձնառու է փրկելու իր ժողովրդին արհավիրքից։ Ուստի ակնկալում ենք, որ այդ կառույցները կստեղծեն պայմաններ, որոնք կխթանեն Արցախի ժողովրդի արժանապատիվ կյանքի ապահովումը»։
