Թեհրանում այնպիսի պատկերացում է ձևավորվում, թե Հայաստանը դառնում է Իրանի դեմ թշնամաբար տրամադրված ուժերի գործունեության կենտրոնը. հունվարի 14-ին կայացած մամուլի ասուլիսի ժամանակ հայտարարել է Հայաստանում Իրանի արտակարգ և լիազոր դեսպան Խալիլ Շիրղոլամին։
«Մի խումբ մարդիկ հնարավորություն ունեն, և նրանց համար կանաչ լույս է վառվում, որպեսզի գան Հայաստանում Իրանի դեսպանատան շենքի մոտ և հանդես գան անհարգալից ու վիրավորական հայտարարություններով։ Արդեն վեց օր շարունակ՝ ժամը 18:00-ից մինչև 21:00-ն, Իրանի դեսպանատան շենքի առջև հանդես են գալիս անհարգալից ու վիրավորական հայտարարություններով և հակառակ նրան, որ մենք հայտնում ենք մեր բողոքը, այդ գործընթացը շարունակվում է։ Մենք բազմաթիվ անգամներ փոխանցել ենք մեր բողոքը Հայաստանի համապատասխան մարմիններին։ Մենք ամենածանր պահերին կանգնած ենք եղել Հայաստանի կառավարության կողքին, օրինակները շատ են։ Մենք այսօր գտնվում ենք ծանր իրավիճակում և այն, ինչ տեղի է ունենում Հայաստանում Իրանի դեսպանատան շենքի մոտ, կմնա իրանցի ժողովրդի պատմական հիշողության մեջ։ Կարծում եմ՝ ես ամեն ինչ հստակ ասացի»,- նշել է Շիրղոլամին։
Թրամփը, որ հեղինակն է Իրանի դեմ ամենադաժան պատժամիջոցների, որոնք մեծ ներգործություն ունեն Իրանի տնտեսական ծանր վիճակի վրա, այսօր խոսում է Իրանի ժողովրդին աջակցելու մասին։ Իրանում բողոքի ցույցեր այլևս չկան, իրավիճակը լիովին կառավարվում է, իշխանությունների վերահսկողության տակ է։ Դեսպանը պատմեց, որ ահեբակչական խմբավորումները կտրող գործիքներով զինված մտել են մարդկանց մեջ ու նրանց մարմնի այն հատվածների երակները կտրել, որ տեղում մահանան։ Նպատակը՝ սպանությունների առավելագույն թիվ ապահովելն է եղել։
Ինչո՞ւ Իրանում ինտենետային կապն ամբողջությամբ անջատվեց։ Դեսպանը բացատրեց՝ որպեսզի ահաբեկչական խմբավորումների կապն արտաքին աշխարհի հետ կտրվի։ Ահաբեիչների մի մասը ձերբակալվել է, նրանք խոստովանություններ են արել, որոնք կհրապարակվեն։
Խոսելով Իրանի բողոքի ակցիաների մասին, դեսպանը նշել է, որ հաջողելու դեպքում պարտվող կողմ է լինելու նաև Հայաստանը։
Նրա խոսքով՝ շատերը սպասում են, որ Իրանում անկայունություն կլինի և կակտիվանան անջատողական ուժերը՝ նպատակ ունենալով մասնատել երկիրը։ «Հենց դա էլ ի սկզբանե ծրագրված է եղել Իսրայելի կողմից։ Նրանց դա չի հաջողվի, բայց եթե նրանք կարողանան հաջողության հասնել այդ գործում, ապա Հայաստանը կհայտնվի պարտվողների թվում։ Կարծում եմ՝ այս միտքը լրացուցիչ պարզաբանումների կարիք չունի»,- հավելել է դեսպանը։
Դեսպան Խալիլ Շիրղոլամին հայտնել է, որ իրենց մտահոգություները բազմիցս փոխանցել են Հայաստանի պատկան մարմիններին։
