Ռուսաստանի Դաշնության արտաքին գործերի նախարարությունը հայտարարություն է տարածել, որը վերաբերում է Հայաստանի սուվերեն տարածքում հայ-ադրբեջնական շփման գծի հատվածներում Եվրամիության քաղաքացիական դիտորդական առաքելությանն ու պաշտոնական Երևանի դիրքորոշմոնը։
«Հունվարի 23-ին ԵՄ խորհուրդը որոշում կայացրեց Հայաստան ուղարկել Եվրոպական միության նոր քաղաքացիական առաքելություն՝ երկու տարի ժամկետով։ ԵՄ ներկայության կոնկրետ չափանիշները կորոշվեն մոտ ապագայում։ Բայց արդեն ակնհայտ է, որ այն ավելի հավակնոտ է լինելու, քան ԵՄ մոնիտորինգի մեխանիզմը, որը Հայաստանում գործել է անցյալ տարվա հոկտեմբերից դեկտեմբեր ամիսներին։
Անդրկովկասում արտատարածաշրջանային գործոնի համախմբման հարցում Ռուսաստանի սկզբունքային դիրքորոշումը չի փոխվել։ Եթե Բրյուսելն անկեղծորեն շահագրգռված լիներ Անդրկովկասում խաղաղությամբ, ապա իր առաքելության աշխատանքի պայմանների շուրջ Ադրբեջանի հետ կհամաձայներ։
ԱՄՆ-ի և ՆԱՏՕ-ի կցորդի վերածված և ԱՊՀ տարածքում առճակատման քաղաքականություն վարող Եվրամիության ներկայացուցիչների հայտնվելը Հայաստանի սահմանամերձ շրջաններում կարող է միայն աշխարհաքաղաքական առճակատում բերել տարածաշրջան և սրել առկա հակասությունները։
Հայաստան ամեն գնով ոտք դնելու Եվրամիության փորձերը՝ հետ մղելու Ռուսաստանի միջնորդական ջանքերը, կարող են վնասել հայերի և ադրբեջանցիների հիմնարար շահերը տարածաշրջանի խաղաղ զարգացման նրանց ձգտումներում։
Համոզված ենք, որ մոտ ապագայում տարածաշրջանում կայունության և անվտանգության առանցքային գործոնը մնում է Ռուսաստանի, Ադրբեջանի և Հայաստանի ղեկավարների՝ 2020 թվականի նոյեմբերի 9-ի հայտարարության հիման վրա տեղակայված ռուս խաղաղապահ զորախումբը, ինչպես նաև Ռուսաստանի Հայաստանի սահմաններին ծառայող սահմանապահները։ Նրանք կարձագանքեն ԵՄ դիտորդների պահվածքին՝ հաշվի առնելով «տեղում» իրավիճակի զարգացումը։
Մենք արձանագրում ենք, որ Երեւանում, առանց իր տրամաբանական ավարտին հասցնելու ՀԱՊԿ առաքելության ուղղությամբ աշխատանքները, գերադասել են ընտրություն կատարել՝ հօգուտ ԵՄ-ի։ Եթե հայերը շահագրգռված լինեն կիրառել ՀԱՊԿ ներուժը, ապա ՀԱՊԿ առաքելությունը կարող է արագ տեղակայվել Հայաստանում։
Ինչպես նախկինում, մենք կարծում ենք, որ հայ-ադրբեջանական հարաբերությունների կարգավորման և, ընդհանրապես, տարածաշրջանում իրավիճակի բարելավման ամենակայուն և երկարաժամկետ հիմքը Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների խստիվ և հետևողական իրագործումն է։ Ռուսաստանի Դաշնությունը պատրաստ է ամեն կերպ աջակցել դրան»,- ասված է ՌԴ ԱԳՆ հայտարարության մեջ։
