ՆԱՏՕ-ն կաջակցի Ուկրաինայի անկախությանը, ինքնիշխանությանը և տարածքային ամբողջականությանը այնքան ժամանակ, ինչքան որ դա հարկավոր կլինի. ասել է այսօր ՆԱՏՕ-ի գլխավոր քարտուղար Յենս Ստոլտենբերգը բլից հայտարարության ժամանակ, որից հետո նա պատասխանել է լրագրողների հարցերին։
Նա նաև չի բացառել, որ Ուկրաինայի՝ ՆԱՏՕ-ի անդամակցության հարցը Ֆինլանդիայի և Շվեդիայի օրինակով կարող է արագացված ընթացակարգով քննարկվել։ Ստոլտենբերգը հիշեցրել է, որ ՆԱՏՕ-ն այս տարի Մադրիդում հաստատել է Ուկրաինայի իրավունքը՝ ընտրել անվտանգության երաշխիքների սեփական ճանապարհը։
«Յուրաքանչյուր ժողովրդավարական երկիր Եվրոպայում իրավունք ունի ՆԱՏՕ-ին անդամակցելու հայտ ներկայացնել։ Մենք հարգում ենք այդ իրավունքը և ցույց ենք տվել անցած տարիների ընթացքում, որ ՆԱՏՕ-ի դռները բաց են նման երկրների համար», – ասել է նա՝ կոչ անելով Պուտինին դադարեցնել պատերազմը։
«Ռուսաստանը ագրեսոր է, իսկ Ուկրաինան տուժող կողմն է», – նշել է ։
ՆԱՏՕ-ի գլխավոր քարտուղարն արձագանքել է Ռուսաստանի նախագահ Վլադիմիր Պուտինի հայտարարությանը առ այն, որ Ուկրաինայի ևս չորս շրջաններ անցնում են Ռուսաստանի կազմ։
«Սա երկրորդ համաշխարհային պատերազմից ի վեր եվրոպական տարածքում բռնի ուժով բռնակցելու ամենամեծ փորձն է։ Դա Ուկրաինայի տարածքի եւս 15% ն է, որը մոտավորապես Պորտուգալիայի չափ է։ Ռուսաստանը զենքի սպառնալիքով, ապօրինի է գրավել դրանք՝ շինծու հանրաքվեներ կազմակերպելով։ Սա միջազգային իրավունքի լիակատար խախտում է, որովհետև այս հողազավթումը անօրինական է։ ՆԱՏՕ-ի դաշնակիցները չեն ճանաչում և չեն ճանաչելու այդ տարածքները որպես Ռուսաստանի մաս: Մենք կոչ ենք անում բոլոր պետություններին դատապարտել Ռուսաստանի տարածքներ զավթելու բացահայտ փորձերը։ Այդ հողերն Ուկրաինայինն են։ Դոնեցկը Ուկրաինա է։ Լուգանսկը Ուկրաինա է։ Խերսոն Ուկրաինա է, Զապորոժյեն Ուկրաինան է, ինչպես և Ղրիմն է Ուկրաինա։ Սա արդեն երկրորդ դեպքն է, երբ Ռուսաստանը ուժով զավթում է Ուկրաինայի տարածքը։ Բայց դա չի փոխում հակամարտության էությունը։ ՆԱՏՕ-ն հակամարտության կողմ չէ. բայց աջակցում է Ուկրաինային, որպեսզի նա կարողանա պաշտպանել ՄԱԿ-ի կանոնադրությամբ ամրագրված իր ինքնապաշտպանության իրավունքը: Եվ մեր դաշինքը պաշտպանական է։ ՆԱՏՕ-ն պաշտպանել և պաշտպանելու է ՆԱՏՕ-ի յուրաքանչյուր դաշնակցին: Պուտինը հարյուր հազարավոր լրացուցիչ զորքեր է մոբիլիզացրել, միջուկային զենքով է սպառնում, անեքսիայի ենթարկեց էլ ավելի շատ ուկրաինական տարածք։ Ընդհանուր առմամբ, սա պատերազմի սկզբից ի վեր ամենալուրջ էսկալացիան է: Այս ամենը ուժի վկայություն չէ, այլ թուլության նշան է և խոստովանություն, որ պատերազմն ըստ պլանի չի ընթանում։ Այս պատերազմի պատասխանատվությունը ամբողջությամբ Պուտինի վրա է», – ասել է Յենս Ստոլտենբերգը։
