«Համախմբում» շարժման անդամ, հասարակական-քաղաքական գործիչ Ավետիք Չալաբյանի քրեական գործը մակագրվել է դատավոր Մնացական Մարտիրոսյանին։
5 վարկանիշ ունեցող Մարտիրոսյանը, այն դատավորն է, ում անվերապահորեն «վստահում» է իշխանությունը: Նա էր քննում ու շարունակաբար մերժում Արցախի հերոս Մանվել Գրիգորյանի պաշտպանների կալանքը փոխելու միջնորդությունները:
Հենց Մնացական Մարտիրոսյանի նախագահությամբ դատական նիստի ժամանակ էր, որ հանկածամահ եղավ պրոդյուսեր Արմեն Գրիգորյանը:
Նա է քննում նաև նախկին գլխավոր դատախազ, Քննչական կոմիտեի նախկին նախագահ Աղվան Հովսեփյանի գործը:
Ըստ մեղադրական եզրակացության՝ Ավետքի Չալաբյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 8-ին, Հայաստանի ազգային ագրարային համալսարանի ուսանողական խորհրդի սենյակում նույն համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդության, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար։
Այս գործով անցնող Էմմա Գևորգի Սարգսյանը, ում նկատմամբ որպես խափանման միջոց է ընտրվել ստորագրություն չհեռանալու մասին, մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող «Դալան» ռեստորանում, այնուհետև մայիսի 8-ին, Հայաստանի ազգային ագրարային համալսարանի ուսանողական խորհրդի սենյակում նույն համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդության, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար:
Նշենք, որ ըստ Ավետիք Չալաբյանի պաշտպանական թիմի՝ վերջինս քաղաքական հետապնդման է ենթարկվում։
