Այս պահին Կարապետյաններն ունեն հաստատված ներդրումային ծրագիր մինչև 2034 թվականը։ Այս պահին ՀԷՑ–ի սեփականատերը հանդիսանում են, այո՛, Կարապետյանները, և, բնականաբար, պարտավոր են իրենց պլանային ներդրումները շարունակել այնպես, ինչպես պետք է շարունակեին այն ընթացքում, երբ որ չկար նշանակված ժամանակավոր կառավարիչ։ Այս մասին այսօր լրագրողների հետ ճեպազրույցի ժամանակ նշեց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
«Այդ մասով մենք խնդիր չունենք. ինչ պլանավորել էին անելու, պարտավոր են անելու։ Ժամանակավոր կառավարիչի նշանակման հարցը առաջ է եկել այն պահից, երբ կառավարության լիազոր մարմնի կողմից, տվյալ դեպքում տարածքային կառավարման և ենթակառուցվածքների նախարար Դավիթ Խուդաթյանի կողմից ՀԾԿՀ-ն ստացել է հաղորդագրություն այն մասին, որտեղ հարց է բարձրացվում փակ բաժնետիրական ընկերությունում կառավարման մենեջմենտի վատ որակի վերաբերյալ, տեխնիկական սպասարկման վատ որակի վերաբերյալ, մատուցված ծառայությունների որակի վերաբերյալ, կատարված ներդրումների անարդյունավետության վերաբերյալ։
Եվ նմանատիպ մի շարք կարևոր հարցերի վերաբերյալ պետությունը հարց էր բարձրացնում, որ կարիք կա այս հարցերը ուսումնասիրելու, և ամենակարևորը, որ վերջին հաշվով այս ամենը կարող է բերել երկրի էներգետիկ անվտանգության խաթարմանը»,–-ասաց նա։
Հարցին՝ հիմա այլևս մարդկանց լույսները չեն մարելո՞ւ, Մեսրոպյանը պատասխանեց. «Լույսերը կարող են մարել և՛ դրանից առաջ, և՛ այսօր, և՛ վաղը, որովհետև լույսերի մարելու գործընթացը որևէ կառավարիչ, որևէ պետական ղեկավար, որևէ սեփականատեր չի կարող բացառել։ Հարցն այն է, թե այդ լույսերը ի՞նչ հաճախականությամբ են մարում, ի՞նչ պատճառով, ի՞նչ տևողությամբ ր ի՞նչ արագությամբ են վերացնում հետևանքները»,- ամփոփեց Մեսրոպյանը։
