Սրբազան պայքարի ռազմավարության առումով կարող եմ ասել, շատ որոշակիացած է, թե ինչ ճանապարհով ենք գնալու: Այս մասին, այսօր՝ դեկտեմբերի 10-ին, լրագրողների հետ զրույցում ասաց Բագրատ արքեպիսկոպոս Գալստանյանը։
Նա այսօր մասնակցում էր Հինգ իրավապաշտպանների նախաձեռնությամբ Բռնադատվածներին նվիրված հուշահամալիրի մոտ հրավիրած հավաքին։
Հարցին՝ քաղաքական ուժերի հետ հանդիպումներ ունեցե՞լ է, նա պատասխանեց. «Ում հետ պետք է: Որ ուժերի հետ որ անհրաժեշտ է հանդիպել, այո»:
«Քաղաքականությունը շատ վեհ արվեստ է, բայց երբ այն երբ վերածվում է արհեստի, դառնում է ուղղակի առևտուր։ Ես առևտրականների հետ գործ չունեմ»,-ասաց Սրբազան շարժման առաջնորդը։
Դիտարկմանը, որ ակտիվիստ Նարեկ Մալյանը հարց էր բարձրացրել, որ եթե Բագրատ Սրբազանը հավակնում է ՀՀ վարչապետի պաշտոնին, ինչո՞ւ չի հրաժարվում Կանադայի քաղաքացիությունից, նա արձագանքեց. «Նախ, ես չեմ հավակնում ոչ մի բանի, բացարձակ: Ես ասում եմ՝ ես միջոց, գործիք, հնարավորություն եմ այդ փոփոխությունը կատարելու համար: Կարծում եմ՝ ով որ հավակնում է, նա պարզապես չգիտի՝ ինչ է ուզում կյանքում: Երկրորդ, Կանադայի քաղաքացիությունից հրաժարվել-չհրաժարվելը երկրորդ երրորդ տասներորդական հարց է: Եվ եթե ուզում եք ավելի լայն իմաստով ասեմ, մեր երկրում կամ դրսում, սփյուռքում գործող ապրող մեր հայրենակիցները պետք է լիակատար իրավունք ունենան մասնակցելու մեր երկրի կյանքին՝ և ընտրելու, և ընտրվելու, և նշանակվելու:
Իսկ իմ քաղաքացիությունից հրաժարվել-չհրաժարվել ոչ մեկին չի վերաբերում, բացարձակ։ Ես շատ բանից հրաժարվել եմ, էլի կարող եմ հրաժարվել, դա ինձ համար պարզապես միջոց է»:
