«Արարատցեմենտում», «Մուլտի վելնեսում», Երևանի Արարատ կոնյակի, գինու, օղու կոմբինատում, «Մուլտի սթոուն» ընկերություններում, «Օլիմպավանում» և Հայաստանի ազգային օլիմպիական կոմիտեում խուզարկություններն ավարտվել են, լրագրողների հետ զրույցում նշեց վերջինիս խոսնակ Իվետա Տոնոյանը։
«Ցավոք սրտի, պետք է հայտնեմ, որ Հայաստանի ազգային օլիմպիական կոմիտեն կապարակնքվել է և դադարեցվել է գործունեությունը։ Սա իրականում միջազգային մակարդակի խայտառակություն է, որովհետեւ սրանով շատ մեծ վնաս է հացվում ՀՀ միջազգային հեղինակությանը. քաղաքակիրթ աշխարհում նման նախադեպ չի եղել։ Առավել քան վստահ եմ, որ այս գործողության աղետաբեր հետևնքները ՀՀ իշխանությունները և այն անձինք, որոնք ստանձնել են այս ամբողջ գործընթացի պատասխանատվությունը, շատ կարճ ժամանակահատվածում տեսնելու են։
Կապարակնքվել է նաև «Արարատցեմենտ» գործարանը, Երևանի Արարատ կոնյակի, գինու, օղու կոմբինատը, կոմբինատի հարևանությամբ գտնվող վարչական շենքը՝ քաղաքապետարանի դիմաց գտնվող բարձր աշտարակը։ Վարչական շենքը ևս կապարակնքվել է, այդտեղ «Մուլտի գրուպ» կոնցեռնի գրասենյակներն են ու հաշվապահությունը։
«Մուլտի սթոուն» ընկերությունը, որ քարերի արտադրությամբ է զբաղվում, ևս կապարակնքված է և դադարեցված է գործունեությունը։ «Օլիմպավանում» դեռ գործողությունները շարունակվում են, բայց այդտեղ ունենք խնդիր, քանի որ ԱՄՆ–ի ըմբշմարտի հավաքականն էր մարզվում, UFC վարկածով աշխարհի չեմպիոն ունենք, ով մարզումներ էր անցկացնում, և այդ մասով լրջագույն խնդիրներ են առաջացել։
«Փարավանում», «Մուլտի գրանդ» հյուրանոցում շարունակվում են խուզարկությունները։
Բոլոր այդ ընկերությունները, մասնավորապես, «Արարատ ցեմենտ» գործարանը, «Մուլտի սթոունը», «Մուլտի վելնեսը», Երևանի Արարատ կոնյակի, գինու, օղու կոմբինատը, որոնք կապարակնքվել են ՔԿ–ի կողմից, բոլոր աշխատակիցները դուրս են բերվել, այդ թվում անվտանգության աշխտակիցները, սպասարկող անձնակազմը, ինչը անվտանգության լրջագույն խնդիրներ կարող է առաջացնել, որովհետեւ դրանցից մի մասը գործարաններ են, որտեղ կան պայթյունավտանգ նյութեր։ Այս մասով մեր իրավաբանները զբաղվում են, որ բողոքարկման գործընթաց սկսենք, որ գոնե այդ հիմնարկների անվտանգությունը կարողանանք ապահովել»։
Նշենք, որ այսօր առավոտից ԲՀԿ առաջնորդ Գագիկ Ծառուկյանի ընտանիքին պատկանող մի քանի տասնյակ ընկերություններում զանգվածային խուզարկություններ են ընթանում։
