Հունիսի 6-ին Երևանում՝ Կարեն Դեմիրճյանի անվան մարզահամերգային համալիրում, տեղի է ունենալու ՀԱՊԿ ԽՎ խորհրդի նիստը: Նիստին թեև հրավիրված են նաև Հայաստանի խորհրդարանի ընդդիմադիր խմբակցությունները, սակայն, Past.am-ի տեղեկություններով, նրանք որոշել են չմասնակցել։
Կայքի աղբյուրի փոխանցմամբ, աննպատակահարմար համարելով մասնակցությունը՝ ԱԺ երկու ընդդիմադիր խմբակցությունները նամակ են ուղարկել նիստը նախագահող՝ Ռուսաստանի Դաշնության Պետդումայի նախագահ Վյաչեսլավ Վոլոդինին՝ տեղեկացնելով իրենց որոշման մասին և ներկայացնելով իրավիճակը։ Խմբակցությունները նամակում նշել են, որ քանզի, ըստ նիստի ֆորմատի, ելույթի իրավունք ունեն միայն խորհրդարանների խոսնակները, իսկ ընդդիմությունը ելույթով հանդես գալ չի կարող, իրենք նպատակահարմար չեն համարում մասնակցությունը՝ պնդելով, որ Հայաստանի գործող իշխանությունը չի ներկայացնում Հայաստանի ու հայ ժողովրդի շահերն ու դիրքորոշումը։
Ընդդիմադիր պատգամավորները նաև կարևոր են համարել երկխոսությունը ՀԱՊԿ մասնակից-պետությունների գործընկերների հետ և նամակում հույս են հայտնել, որ հնարավոր կլինի կազմակերպել հանդիպումներ ՀԱՊԿ անդամ պետությունների պատվիրակների և ԱԺ երկու ընդդիմադիր խմբակցությունների ղեկավարների ու ներկայացուցիչների հետ՝ ներկայացնելու համար օրակարգային հարցերի շուրջ Հայաստանի ընդդիմության մոտեցումները։
