Երևանը դեռ երբեք այս վիճակում չէր եղել. անձրևի ժամանակ՝ բառացի ջրհեղեղ, այնպես, որ ավտոմեքենաները լիովին սուզվեն ջրի տակ, ջուրը ջրվեժի պես լցվի վերանորոգված գետնանցում ու հեղեղի այնտեղի սրճարաններն ու խանութները…սա ձվի մեջ մազ ման գալ չի, ոչ էլ իշխանություններին ամեն պարագայում քննադատելու մտասևեռվածություն։
Երևանը երբեք հեղեղ չի տեսել։
Ավագանու նիստերին, գործակարգավարական խորհրդակցություններին քպ-ական խմբակն ու իր պարագլուխն այնպիսի ինքնասիրահարվածությամբ են ամբիոնին մոտենում ու ելույթ ունենում, ասես իրենց աստեղային ժամն է, կարմիր գորգի վրայով են անցնում, ելույթից հետո էլ «Օսկարի» ակնկալիք ունեն բոլոր անվանակարգերում։
«Սեպտեմբերի 13-ին տեղացած հորդառատ անձրեւի հետեւանքով փրկարարները մի շարք հասցեներից հեռացրել են ջուրը. շուրջ 228 տոննա ջուր է դուրս բերվել։ Ջրածածկ տարածքից դուրս է բերվել 8 ավտոմեքենա. հայտնում է ՀՀ ՆԳՆ-ն»,- այսպիսի հայտարարություն է տարածել փրկարար ծառայությունը։
Այսպիսի հաղորդագրություն չէինք կարդացել երբևէ։ Փաստորեն, յուրաքանաչյուր անձրևից հետո Երևանում արտակարգ իրավիճակ է ստեղծվում. հապա Արտակարգ իրավիճակների նախարարությունն ինչո՞ւ փակեցիք, այդ կառուցը Երևանին հաստատ պետք էր։
Քաղաքային իշխանությունները մեղքն ում ու ինչ վրա ասես բարդումեն՝ է՛լ անսպասելի անձրևներն են մեղավոր, է՛լ շինարարներն են մեղավոր, որ կուտակված շինանյութը անձրևից ցրվում-լցվում է փողոցները, է՛լ մարդիկ են մեղավոր, որ աղբը իբր լցնում են ջրատարները…
Մարդիկ նույն մարդիկ են, ջրատարներն էլ՝ նույնը, եթե, իհարկե, ինքներդ ջրատարները չեք ասֆալտել կամ ջրագծերը փոխել։ Ինչո՞ւ նախկինում այսպիսի ջրհեղեղներ չէին լինում։
Ինչո՞ւ չեք խոստովանում, որ Երևանում հազարավոր բարձրահարկերի շինթույլտվություն եք տվել՝ առանց մտածելու, որ մի սանտիմետր անգամ ազատ տարածք չեք թողել, որ հողը կլանի ջուրը, ամենուր շենք է, բետոն, քար…
Ավտոբուսների փոխարեն, ինչո՞ւ չեք նավակներ ու լաստեր բերում. մեկ է՝ փողն էլ եք դուք տնօրինում, իշխանությունն էլ։ Բերք էլի. համ էլ ջրային տրանսպորտի վարչություն կբացեք, ձեր մարդկանցից մեկին պետ կնշանակեք, մասնագետ չունե՞ք… պա՜հ, իբր մնացած պետերը կամ բուն քաղաքապետը անկրկնելի մասնագետ է…
1 միլիարդ 820 միլիոն դրամ է հատկացվել Երևանի բյուջեից, որպեսզի քաղաքային իշխանությունները ջրահեռացման հարցը լուծեն։ Փողն էլ է իրենցը, իշխանությունն էլ, մեխանիզմներն ու ամբողջ համակարգն էլ, բայց արի ու տես, որ նորից ձախողում են, չեն անում, չեն կարողանում անել, չեն ուզում անել։ Փաստ է՝ ԱՐՎԱԾ ՉԷ։
Փողը դուրս են գրել, գործը չեն արել։
Ու դեռ երես ունեն, ավագանու նիստերին քմծիծաղով, սարկազմով, իրոնիայով սրան-նրան են քննադատում, ընդդիմությանը ձեռք առնում, արտահերթ ընտրությունների մասին խոսք գցում, թե՝ եկեք գնանք արտահերթի, կտեսնեք, որ երևանցին էլի քպ է ընտրելու։
