Նախաքննական մարմինը միջնորդեց, որպեսզի նիստն արվի փակ, սակայն եմնք առարկեցինք, այսօր ԿԸՀ-ի դիմաց լրագրողների հետ զրույցում նշեց «Ուժեղ Հայաստան» դաշինքի պատգամավորի թեկնածու Դավիթ Ղազինյանը՝ անդրադառնալով իրեն անձեռնմխելիությունից զրկելու հարցին։
«Դատախազությունը որևէ բան չկարողացավ հիմնավորել, իրենք արդեն խախտել են նախաքննության գաղտնիքի շեմը։ Ինչպես նաև ԿԸՀ նախագահը հայտարարեց, որ չեն պատրաստվում գործը, որպես այդպիսին, ամբողջությամբ քննել, այսպես ասած՝ դատարանի դեր կատարել։ Մենք նույն հաջողությամբ առարկեցինք, որ եթե այդպես է՝ այդ դեպքում ինչո՞ւ բաց չլինի և արտագհայտեցինք մեր հստակ դիրքորոշումը, որ սա քաղաքական պատվեր է, քաղաքական պատվերի քողի ներքո են ուզում անել։
Փորձում են իմ և իմ ընտանիքի կենսագրության (ինչու եմ ասում՝ փորձում են, որովհետև չի ստացվի ոչ մի պարագայում) և ամենակարևորը վախենում են, որ հասարակությունն ուղիղ եթերը լսելու դեպքում կհասկանա, թե ինչ է տեղի ունենում»,- ասաց նա։
Նշենք, որ մինչ Կենտրոնական ընտրական հանձնաժողովը քննարկում է Դավիթ Ղազինյանին անձեռնմխելիությունից զրկելու դատախազության միջնորդությունը, վերջինս իր պաշտպանական թիմից փաստաբան Արշակ Վարդանյանի հետ ուղևորվեց Հակակոռուպցիոն կոմիտե:
Լրագրողների հարցին՝ ինչու եք գնում, միգուցե ԿԸՀ-ն անձեռնմխելիությունից զրկելու համաձայնություն չի՞ տալիս, Ղազինյանն այսպես արձագանքեց.
«Ինչո՞ւ թույլ տանք՝ իրենց շոուն իրականացնեն: Դե ես համեստաբար կսպասեմ այնտեղ։ Որ չընդունեն, հո դռները չե՞մ ջարդի, ներս մտնեմ: Ես լավատես եմ. որը բարին է՝ Աստված կատարում է: Ես շատ լավատես ու ուրախ եմ, որ այս իշխանությունների վիճակն այնքան վատ է, որ դիմում են այսպիսի մեթոդների: Ես կենտրոնական ընտրական հանձնաժողովում մի արտահայտություն եմ արել, ասացի՝ մի քանի օր առաջ ինչ արեցիք, իմ գործը դրա համեմատ մանրուք է։ Եթե կարողացաք 58.000 ձայն գողանալ, մեկից տալ մյուսին, ես ո՞վ եմ, որ ինձ վերաբերող հարցը չբավարարեք»:
