Թրամփը հրապարակել է իր լուսանկարը՝ Հռոմի պապի հագուստով. որոշ կաթոլիկների դա դուր չի եկել
Որոշ կաթոլիկներ քննադատել են ԱՄՆ նախագահ Դոնալդ Թրամփին Truth Social սոցիալական ցանցում արված գրառման համար, որում Սպիտակ տան ղեկավարը հանդես է գալիս որպես Հռոմի պապ. գրում է BBC News-ը։
Թրամփը արհեստական ինտելեկտի կողմից ստեղծված պատկերը հրապարակել է շաբաթ օրը, և գրառումը տարածվել է նաև Սպիտակ տան պաշտոնական X էջում և այլ սոցիալական ցանցերում։
Լուսանկարում Թրամփը պատկերված է սպիտակ շարֆով և միտրով, ձեռքին մեծ խաչ է պահում և բարձրացնում ցուցամատը։
Նկարը հրապարակվել է այն ժամանակ, երբ աշխարհի կաթոլիկները սգում են Հռոմի պապ Ֆրանցիսկոսի մահը և պատրաստվում են հաջորդ պապի ընտրությանը։
Թրամփը նախկինում կատակել էր այս հարցի շուրջ՝ լրագրողներին ասելով, որ «կցանկանար ինքը Հռոմի պապ լինել»։
Նյու Յորքի կաթոլիկ համաժողովը, որը ներառում է այդ նահանգի եպիսկոպոսներին, արձագանքել է Թրամփի հրապարակմանը։ «Այս լուսանկարում ոչ մի զվարճալի բան չկա, պարոն նախագահ, – ասվում է կազմակերպության հայտարարության մեջ։ -Մենք հենց նոր թաղեցինք մեր սիրելի Հռոմի պապ Ֆրանցիսկոսին, և կարդինալները շուտով կսկսեն հանդիսավոր կոնկլավ՝ Սուրբ Պետրոսի նոր իրավահաջորդ ընտրելու համար։ Մեզ ծաղրելու կարիք չկա»։
Իտալիայի նախկին վարչապետ և ձախակողմյան Սոցիալ-դեմոկրատական կուսակցության առաջնորդ Մատեո Ռենցին նույնպես քննադատել է Թրամփի գրառումը։
«Այս պատկերը վիրավորում է հավատացյալների զգացմունքները, վիրավորում է ինստիտուտները և ցույց է տալիս, որ աջակողմյան քաղաքականության աշխարհի առաջնորդը վայելում է իր ծաղրածու լինելը», – իտալերեն գրել է Ռենցին համացանցում։
Թրամփի՝ սոցցանցերում արված գրառումները բուռն քննարկումների առիթ են դարձել։ Շատ օգտատերեր նկարը վիրավորական են համարել, սակայն ոմանց դուր է եկել կատակը։
ԱՄՆ փոխնախագահ Ջ.Դ. Վենսը (կաթոլիկ է) նույնպես միացել է քննարկմանը։ Լրագրող Բիլ Քրիստոլի այն հարցին, թե ինչպես է վերաբերվում «Սուրբ Հոր նկատմամբ անհարգալից վերաբերմունքին և ծաղրին», Վենսը գրել է . «Որպես կանոն, ես դեմ չեմ, որ մարդիկ կատակներ անեն: Բայց ես դեմ եմ նրանց, ովքեր սկսում են հիմար պատերազմներ, որոնք սպանում են իմ հազարավոր հայրենակիցների»:
Վատիկանի խոսնակ Մատեո Բրունին հրաժարվել է մեկնաբանել Թրամփի գրառումը, երբ շաբաթ օրը մամուլի ասուլիսի ժամանակ հարցրել են դրա մասին։
Նոր պապի ընտրության կոնկլավը պետք է սկսվի Վատիկանում չորեքշաբթի՝ մայիսի 7-ին։
