«Թեհրանից Երևան զենք է տեղափոխվել». Բաքուն հերթական ջղաձգումների մեջ մեղադրում է Իրանին

«Վերջին օրերին տեղեկություններ են տարածվել Իրանից Հայաստան ռազմական բեռների ինտենսիվ փոխադրման մասին։ Իրանից վերահսկվող հեռագրային ալիքները նույնպես տարածում են այս անթույլատրելի քայլի հետ կապված տարբեր փաստեր։ Ըստ տեղեկությունների՝ միայն մարտի 29-ից ապրիլի 4-ն ընկած ժամանակահատվածում Սարաբից և Թեհրանից առնվազն 5 չվերթ է իրականացվել իրանական ավիաուղիների BOING բեռնատար ինքնաթիռով, որը նախկինում կիրառվել է ԻՀՊԿ-ի կողմից ռազմական բեռներ փոխադրելու համար։

Որոշ փորձագետների կարծիքով, Իրանը զինելով Հայաստանին և միտումնավոր այդ մասին պնդումներ տարածելով, մտադիր է ճնշում գործադրել Ադրբեջանի վրա։ Սրան  աջակցում են նաև իրանցի որոշ պաշտոնյաների՝ վերջին օրերին Ադրբեջանի դեմ արված հայտարարությունները։

Ամեն դեպքում, այս հարցը ադրբեջանական հանրության ուշադրության կենտրոնում է։ Սակայն Իրանի պաշտոնյաներն այս անգամ եւս չեն հաստատում կամ հերքում տարածված տեղեկությունը»,- գրում է  ադրբեջանական APA-ն։

 Ադրբեջանական մամուլը գրում է, որ խնդրի վերաբերյալ  հարցումներ է ուղարկել Ադրբեջանում Իրանի դեսպանատուն, սակայն դիվանագիտական ​​առաքելությունը շարունակում է  լռել։

 «Այս լռությունը կարող է վկայել այն մասին, որ շրջանառվող պնդումները ճիշտ են, և Իրանը ոչինչ չունի ասելու ճշմարտությանն ի պատասխան։ Կամ դա կարող է նշանակել, որ ոչ Թեհրանը, ոչ Բաքվում Իրանի դեսպանատունը պատշաճ չեն համարում  մեկնաբանել ադրբեջանական հանրությանը հուզող հարցը:

Փաստորեն, Իրանի կողմից Հայաստանին զինելու մասին տեղեկությունն ադրբեջանական հանրության համար այլեւս անակնկալ չէ։ Չի մոռացվել այն փաստը, որ Թեհրանը, որը մինչ Հայրենական  պատերազմը (արցախյան 44-օրյա պատերազմ-խմբ.Azg.am) խոսում էր իսլամական համերաշխության և «պատմական բարեկամության ու եղբայրության»  մասին, պատերազմի ընթացքում, տագնապած լինելով Ադրբեջանի հաղթանակներից, տարբեր տեսակի զինտեխնիկա է տեղափոխել Հայաստան՝  Անզալի և Նովշահր նավահանգիստներից»,-գրում է APA-ն։

Այնուհետև թշնամի երկրի լրատվամիջոցը սրտաճմլիկ պատմություն է ներկայացրել, թե Հարավային Ադրբեջանի շատ քաղաքներում բազմիցս բողոքի ակցիաներ են տեղի ունեցել պատերազմի ընթացքում Թեհրանի կողմից Հայաստանին զինելու հետ կապված, որի ընթացքում ավելի քան հարյուր ադրբեջանցիներ դաժան ծեծի են ենթարկվել և ձերբակալվել անվտանգության ուժերի կողմից: Իրանցի պաշտոնյաները ոչ այն ժամանակ, ոչ էլ հիմա իրենց կարծիքը չեն հայտնել ադրբեջանական հասարակությանը անհանգստացնող ապակառուցողական գործունեության մասին, չեն արդարացրել կամ հերքել դրանք։

«Այս վերաբերմունքը ևս մեկ անգամ ապացուցում է, որ Իրանի քաղաքականությունը պատված է մութ շղարշով և հեռու է թափանցիկ լինելուց։

Այս ֆոնին Իրանի պաշտոնյաները չեն հրաժարվում Ադրբեջանի հասցեին իրենց սպառնալից հայտարարություններից։ Մի քանի օր առաջ Իրանի խորհրդարանի պատգամավորը որպես թիրախ նշել էր Ադրբեջանում Իսրայելի դեսպանատունը։ Իրանի Իսլամական Հանրապետությունը, հետեւողականորեն զինելով Հայաստանին, ցույց է տալիս, թե ինչ նշանակություն է տալիս Ադրբեջանին և ադրբեջանական ժողովրդին, որի վրա փորձում է ճնշում գործադրել տարբեր միջոցներով, ինչպես նաև իսլամական համերաշխության և իսլամական շարիաթի միջոցով։ Հենց այս պատկերն է ի հայտ եկել Իրանի պաշտոնյաների վիրավորական լռության ֆոնին, որոնք չեն արձագանքում ադրբեջանական լրատվամիջոցների խնդրանքներին»,-մանիպուլյացիան ու զրպարտչական մեղադրանքները  շարունակել է ադրբեջանական APA-ն։

Ագրեսոր, օկուպանտ երկիրը չի հասկանում, որ երբ ինքը զինվում է մինչև ատամները, ամեն օր նոր զենքեր գնում ու դրա մասին հրապարակում, տեսանյութերով ու լուսանկարներով ցուցադրում, թե զանգվածային ոչնչացման ինչ զինատեսակներ է բերել Իսրայելից, Թուրքիայից, ուրեմն տարամաբանական է, որ Հայաստանն էլ չպետք է ձեռքերը ծալած նստի։ Բայց անտրամաբանական մեղադրանքների մեջ Ադրբեջանը ստեղծել է երևակայական թշնամիների մի ցանկ, որտեղ բոլորը պետք է իր ասածով շարժվեն, չունենան իրենց սեփական շահերը և միայն մտածեն Բաքվի բարօրության մասին։