Մայիսի 17-ին նախարարների խորհուրդի նիստի ավարտին Թուրքիայի նախագահ Էրդողանը հանկարծ վերհիշում և պատմում է Իսրայելի վարչապետի հետ տարիներ առաջ ունեցած հանդիպումից մի դրվագ, երբ ինքը նույնպես վարչապետ էր, նշելով. “Հրեա վարչապետն ինձ ասաց. “Որպես գեներալ ծառայությունից հաճույք էի զգում այն ժամանակ, երբ պաղեստինցի էի սպանում”: Այս ամենը նա իմ երեսին էր ասում, այն էլ Իսրայել այցելության ժամանակ: Սրանք ստորաքարշ արարածներ են, արյունով են սնվում միայն”:
Էրդողանի այս խոսքերը մամուլի էջերում հայտնվելուն պես ԱՄՆ պետքարտուղարությունը, ի դեմս խոսնակ Նիդ Պրայսի, իսկույն դատապարտել է Էրդողանին և մեղադրել հակասեմականության մեջ: Մայիսի 19-ին մեղադրանքին Էրդողանի փոխարեն պատասխանել են փոխնախագահ Ֆուաթ Օքթայը, գլխավոր խորհրդական և խոսնակ Իբրահիմ Քալընն ու հանրային կապերի վարչության ղեկավար Ֆահրեթդին Ալթունը, ամբաստանելով պետքարտուղարությանը ստախոսությամբ: Հատկանշական է պետքարտուղարությանը դատապարտելու հարցում վերոհիշյան թուրք գործիչներին են միացել Թուրքիայի հրեական համայնքի ղեկավարները, տարածելով հաղորդագրություն, որտեղ մատնաշվում է.. “Նախագահ էրդողանին հակահրեա անվանելը հանիրավի մոտեցում է և ամոթալի: Ընդ հակառակը, նա մեր հանդեպ մշտապես հոգատար է եղել, աջակցել է մեզ”: Մինչդեռ մի քանի օր առաջ, երբ Թուրքիայի հրեական համայնքը Ռամադանի տոների առթիվ շնորհավորել էին թուրք հասարակությանը, թուրքերը սոցցանցում թուքումուր չէին թողել, որ թափեն հրեաների և իսրայելի գլխին:
