Ես ընդհանրապես զարմանում եմ վարչապետի ներվերի վրա, կարծում եմ՝ դրանք բետոնից ու երկաթից են, այսօր լրագրողների հետ ճեպազրույցում ասաց ԱԺ նախագահ Ալեն Սիմոնյանը։
«Ես զարմանում եմ, որ ինքը դիմանում է այն ամենին, ինչի միջով մենք անցնում ենք։ Ես, օրինակ, հաճախ չեմ դիմանում և չեմ կարծում, որ մեզնից յուրաքանչյուրը կարող է դրա կեսի կեսին դիմանալ»,- ասաց նա։
Ալեն Սիմոնյանի համոզմամբ՝ լարվածությունն ու ատելությունը դաշտ են բերել ընդդիմադիրները։
«2021 թվալկանից սկսած՝ իրենք մեզ գնդակահարում էին, բանտեր էին նետում։ «Թուրք», «դավաճան», «հողատու» վիրավորանքները կարծես թե մենք չենք դրել շրջանառության մեջ»,- ասաց Ալեն Սիմոնյանը։
Ըստ ԱԺ նախագահի՝ Նիկոլ Փաշինյանը սեր և վստահություն է վայելում մարդկանց շրջանում՝ ի շնորհիվ անմիջական հայ մարդու կերպարի, և քաղաքացիները նրան համարում են իրենց ընտանիքի անդամներից մեկը։
Հարցին՝ արդյոք հարիր է երկրի վարչապետին այդքան բռնկուն վարք դրսևորել, Սիմոնյանը պատասխանեց՝ այն պատկերացումը, որ շատերն ունեն քաղաքական գործչի մասին, վաղուց գոյություն չունի։ Որպես իր ասածի ապացույց՝ ԱԺ նախագահը բերեց ԱՄՆ-ի, Մեծ Բրիտանիայի, Ֆրանսիայի օրինակները։
«Խնդրում եմ և խորդհուրդ եմ տալիս՝ թազա թեմա գտեք, որովհետև այդ թեման որևէ մեկին չի գրավում։ Ես ասում եմ՝ Նիկոլ Փաշինյանը նույնիսկ քիչ է խոսում»,- ասաց Սիմոյանը՝ շեշտելով, որ Փաշինյանի հանդեպ կշտամբանքի և բողոքի դրսևորումներն ինքնաբուխ չեն, դրանք ինչ-որ շահագրգիռ խմբերից են ուղղորդված։
