Այսօր տեղի ունեցած ասուլիսի ընթացքում «Հայաքվե» նախաձեռնության համակարգող Ավետիք Չալաբյանը հայտարարել է, թե «Երևանի վարչական շրջանների մի շարք ղեկավարներ, հղում անելով Երևանի քաղաքապետի պաշտոնակատար Լևոն Հովհաննիսյանին, հրաժարվել են տարածքներ տրամադրել ստորագրահավաքի անցկացման համար». «Հայաքվե» նախաձեռնության համակարգող Ավետիք Չալաբյանի հայտարարությունն արձագանքել է Երևանի քաղաքապետարանի աշխատակազմի լրատվության վարչության ղեկավար Լևոն Սարդարյանը։
Նա նշել է, որ խոսքը, մասնավորապես, վերաբերում է մայրաքաղաքի Ավան, Նոր Նորք, Կենտրոն, Նուբարաշեն և Աջափնյակ վարչական շրջաններին:
Սակայն Ավան վարչական շրջանի ղեկավարի պատասխանը «Հայաքվե» նախաձեռնության լիազորված անձ Արամ Պետրոսյանին՝ փաստում է, որ ստորագրահավաքի անցկացման համար ոչ թե հորդորվում է դիմել Երևանի քաղաքապետարանին, այլ նշվում է, որ տարածք չունեն, այսինքն՝ փաստացի մերժվում է։
«Երևանի քաղաքապետարանը հայտարարում է, որ պարոն Չալաբյանի պնդումը փաստերի խեղաթյուրում է, քանի որ վարչական շրջանների ներկայացուցիչները ոչ թե հրաժարվել են նախաձեռնությանը տարածքներ տրամադրել, այլ, մատնանշելով իրավասությունների տարանջատումը, առաջարկել են դիմել Երևանի քաղաքապետարան՝ համապատասխան թույտվություն ստանալու խնդրանքով: Վստահ ենք, որ պարոն Չալաբյանը թյուրիմացաբար է այս առաջարկը գնահատել որպես մերժում»,- նկատել է Լևոն Սարդարյանը։
