Եթե տեսչական մարմինն «Արթկոսմեդ» էսթետիկ վիրաբուժության կենտրոնում խախտումներ հայտնաբերի, ապա կդիտարկվի լիցենզիան դադարեցնելու հարցը, կառավարության նիստին հաջորդած ճեպազրույցի ժամանակ ասաց Առողջապահության նախարար Անահիտ Ավանեսյանը։
«Առողջապահության նախարարությունը երկու ուղղությամբ է աշխատում. ընդհանուր առմամբ, լիցենզավորման ոլորտում մենք գնում ենք խստացման պայմանների։ Առաջիկայում կընդունվի կառավարության որոշման մի ամբողջ փաթեթ, որտեղ նաև այս գործունեության տեսակի համար լիցենզիոն պայմանները շատ ավելի բարձր նիշով են սահմանված լինելու»,- ասաց նախարարը՝ հավելելով, որ այս պահին էլ տեսչական մարմինը նշված կլինիկայում որոշակի ստուգումներ է իրականացնում։
Անահիտ Ավանեսյնաը շեշտեց՝ եթե ստուգման արդյունքում հայտնաբերվեն լիցենզիոն պայմանների խախտումներ, ապա տեսչական մարմինը կդիմի մեզ, և մենք կկասեցնենք կամ կդադարեցնենք լիցենզիան։ Մենք հետևողական ենք լինելու, որպեսզի պարզվի ամբողջական հանգամանքները. ինչո՞ւ է վրա հասել մահը, մահվան պատճառն ի՞նչն է հանդիսացել և արդյոք տեղի է ունեցել բժշկական սխալ՝ ինչպիսին, և դրանից հետո հետևողությունները շատ խիստ են լինելու»։
Հիշեցնենք, որ նշված կլինիկայում օերերս պլաստիկ վիրահատության հետևանքով մահացել էր 56-ամյա Զաբել Կարապետյանը։ Վերջինի ամուսինը մեղադրում է բժշկին, քանի որ, ինչպես պարզվել է, բժիշկը միաժամանակ կնոջ մարմնի հինգ հատվածներում վիրահատություն է սկսել։ Վիրահատությունը կատարած պլաստիկ վիրաբույժ և կենտրոնի ղեկավար Արթուր Սարգսյանը հայտարարությամբ հանդես է եկել՝ կնոջ մահը կապելով սրտի կաթվածի հետ։ Նույն կենտրոնում մահվան ևս մեկ դեպք էր գրանցվել նախորդ տարվա հոկտեմբերի 20-ին։
