Անընդունելի եմ համարում ցանկացած սոցիալական շերտավորում, որը կարող է առնչություն ունենալ նաև սահմանադրական պարտավորությունների հետ, լրագրողների հետ զրույցում այսօր ասաց ՄԻՊ Անահիտ Մանասյանը։
«Չի կարելի այնպիսի իրավական մեխանիզմներ նախատեսել, որոնք կարող են տպավորություն ձևավորել, թե որևէ պարտականության հետ կապված արտոնությունը կարող է պայմանավորված լինել անձի գույքային դրությամբ՝ գումար ունենալով կամ չունենալով։
Բացի այդ՝ բանակում մեծ տարածում ունեն ոչ կանոնադրական հարաբերությունները, և իմ մտահոգությունն այն է, որ ռիսկերը բավարար չափով գնահատված չեն»,- նշեց Անահիտ Մանասյանը։
Նա միաժամանակ նշեց, որ օրինագիծն իր հետ նախապես չի քննարկվել և չի ուղարկվել Մարդու իրավունքների պաշտպանի գրասենյակ։
«Եթե օրինագիծն ընդունվի, Մարդու իրավունքների պաշտպանի գրասենյակն իրավասու է դիմել Սահմանադրական դատարան, հետևաբար ես կարող եմ դիմել Սահմանադրական դատարան»,- ընդգծեց ՄԻՊ-ը։
Նա վստահեցրեց, որ գործադիր իշխանության կողմից որևէ միջամտություն չի զգացել իր աշխատանքում։ «Բազմաթիվ օրինակներ կան, երբ մենք դիմել ենք Սահմանադրական դատարան՝ կառավարության կողմից դրական եզրակացություն ստացած նախագծերի առնչությամբ»,- վստահեցրեց Մանասյանը։
Հիշեցնենք, որ իշխող «Քաղաքացիական պայմանագիր» խմբակցության պատգամավոր Հայկ Սարգսյանը օրինագիծ է ներկայացրել, որով առաջարկում է գումարի դիմաց զինվորական ծառայության ժամկետը կրճատել 1 կամ 4 ամսով։
Նախագծով զինծառայությունից խուսափողները հնարավորություն կունենան ազատվել պատասխանատվությունից՝ այն լրացնելով կամ կրճատված ժամկետը կրելով և համապատասխան գումարները պետական բյուջե մուտքագրելով։
Պաշտպանության նախարարությունը որոշակի առաջարկություններ է արել, որոնց համաձայն՝ ժամկետային զինծառայողը կարող է վճարել 18 միլիոն դրամ և ծառայել 4 ամիս կամ վճարել 24 միլիոն դրամ և ծառայել 1 ամիս։ Բացի այդ, առաջարկվում է մինչև 18 տարին լրանալը քաղաքացիությունից հրաժարվելու համար սահմանել պարտադիր տուրք՝ 15 մլն դրամ։ Փաթեթը դրական եզրակացություն է ստացել կառավարությունից, սակայն խորհրդարանական համապատասխան հանձնաժողովը հասարակության մեջ հնչող քննադատությունների պայմաններում անսպասելիորեն անորոշ ժամանակով հետաձգել է քննարկումը։ Փոփոխությունները նախկինում քննադատել էր նաև Հայաստանի մարդու իրավունքների պաշտպան Անահիտ Մանասյանը։
