ՀՀ մարդու իրավունքների պաշտպան Անահիտ Մանասյանն առաջարկում է ՀՀ վարչապետի կնոջ ֆեյսբուքյան գրառումների հարցով դիմել Կոռուպցիայի կանխարգելման հանձնաժողով։ Այս մասին նա ասաց այսօր լրագրողների հետ ճեպազրույցի ժամանակ՝ անդրադառնալով Աննա Հակոբյանի այն գրառումներին, որոնցում վերջինս վիրավորում և պիտակավորում է քաղաքացիներին։
«Մեր լիազորությունները տարածվում են բացառապես պաշտոնատար անձանց վրա,հետևաբար ընդհանրապես իրավասու սուբյեկտ չեմ պատասխանելու համար։ Նաև էթիկայի կանոնների վրա չեն տարածվում իմ լիազորությունները. դրանք այս առումով սահմանափակված են։ Ի տարբերություն ինձ՝ նման ոլորտում լիազորություն ունի Կոռուպցիայի կանխարգելման հանձնաժողովը, հետևաբար, կարծում եմ, այս հարցը կարող եք իրենց ուղղել»,- ասաց Մանասյանը։
Հիշեցնենք` մայիսի 23-ին հայտնի դարձավ, որ Կոռուպցիայի կանխարգելման հանձնաժողովը (ԿԿՀ) վարույթ է հարուցել ՀՀ վարչապետ Նիկոլ Փաշինյանի վարքագծի կանոնների առերևույթ խախտման վերաբերյալ։ Հանձնաժողով դիմում էր ուղարկել անկախ պատգամավոր Թագուհի Թովմասյանը։
Մայիսի 7-ին կառավարության հետ հարցուպատասխանի ժամանակ Փաշինյանի հունից դուրս էր եկել և ընդդիմադիր պատգամավորների հետ լեզվակռվի ժամանակ օգտագործել «համբալ» արտահայտությունը, ապա բղավել՝ «վեր ընկի տեղդ, ներվերս չուտեք», «սաղիդ պտի տանեմ լցնեմ ԱԱԾ-ի պադվալը»։
