Հարկային օրենսգրքում փոփոխություն և լրացում կատարելու օրենսդրական նախաձեռնությամբ է հանդես եկել «Հայաստան» խմբակցության պատգամավոր Աղվան Վարդանյանը։
ԱԺ-ի՝ մարտի 22-ի նիստի ժամանակ նա առաջարկել է գրահրատարակչության ոլորտում բարեփոխումներ կատարել՝ գրքերի տպագրության և դրա համար անհրաժեշտ նյութերի ներմուծումն ազատել ավելացված արժեքի հարկից։
«Նպատակը հրատարակչական գործին աջակցելն ու ընթերցանությունը խթանելն է։ Աշխարհի շուրջ 30 երկրներում՝ Կանադա, Հորդանան, Մեծ Բրիտանիա, Նորվեգիա, գրքերի համար սահմանվել են զրո տոկոս ԱԱՀ, իսկ Սինգապուրը, Ճապոնիան, Թայլանդը, Բելգիան, Կիպրոսը տպագրված գրքերի համար սահմանել են ԱԱՀ արտոնություն՝ նվազման դրույքաչափի կիրառման միջոցով։ Թուրքիայում սահմանված է 8 տոկոս ԱԱՀ, Վրաստանում և Ադրբեջանում ևս արտոնություններ կան։ Հարցը քննարկվել է ԱԺ ԿԳՄ հանձնաժողովում, սակայն քպական պատգամավորները ձառնպահ են քվեարկել»,- տեղեկացրեց Աղվան Վարդանյանը։
Նա հույս հայտնեց, որ խորհրդարանը, կարևորելով մեր հասարակության կրթական մակարդակի բարձրացումը, կկարևորի այս հարցը։
«Հույս ունեմ, բայց չեք անի»,- ելույթն ավարտեց ընդդիմադիր պատգամավորը։
