Հունիսի 1-ին՝ ժամը 11:15-ին, ոստիկանություն ահազանգ է ստացվել Սևանի ափին գտնվող հանգստյան տներից մեկից, որ իրենց մոտ հանգստացող քաղաքացիներից մեկը չկա, տեղում է հագուստը, բայց քաղաքացին կորել է. «Հայկական ժամանակ»-ի հետ զրույցում հայտնեցին Ներքին գործերի նախարարությունից՝ անդրադառնալով որպես անհետ կորած որոնվող 25-ամյա աղջկա մասին հրապարակումներին:
«Ներքին գործերի նախարարության ենթակա ծառայությունները՝ ոստիկանությունն ու փրկարար ծառայությունը, ահազանգը ստանալուն պես սկսել են որոնողական աշխատանքներ: Այս պահին շարունակվում են որոնողափրկարարական լայնածավալ աշխատանքները, նոր տեղեկատվություն ստանալու դեպքում հանրությանը կիրազեկենք»,- հայտեցին ՆԳՆ-ից:
Նշենք՝ տեղում աշխատում են նաև փրկարար ծառայության ջրասուզակները։
«Ֆեյսբուքում» տարածվել է հետևյալ հայտարարությունը.
Սիրելի ընկերներ, մայիսի 31-ի երեկոյան մեր մշակ Անահիտ Մնացականյանը այցելել է Սևանի վարչական տարածքում գործող «Best Western Bohemian Resort» հանգստյան գոտի։ Այդ գիշերվանից նա Սևանի ափից որպես անհետ կորած է որոնվում։ Համապատասխան գրառումները կցում ենք մեկնաբանություններում։
Մշակները կապի մեջ են ընտանիքի և մտահոգ այլ ընկերների ու հարազատների հետ։ Որոնողական աշխատանքներն ընթացքի մեջ են, ջրասույզ լինելու վարկածը հաստատված չէ, ուստի այս գրառումը տարածելով` գուցե լինի տեղեկություն, որը կարող է ճակատագրական լինել Անահիտին գտնելու հարցում։
Մենք հավատում ենք հրաշքին, ինչը սովորել ենք հենց Անահիտից։ Ձեզ նույնպես խնդրում ենք հավատալ։
Խնդրում ենք որևէ կարևոր, անգամ չնչին տեղեկություն ունենալու պարագայում կապ հաստատել այս հեռախոսահամարով +37495877881 կամ գրել «Մշակութամետ» ֆեյսբուքյան էջին։
