Դեռ չեմ հասցրել ծանոթանալ խաղաղության պայմանագրի նախագծին, քանի որ սա իմ աշխատանքային երրորդն օրն է, լրագրողների հետ ճեպազրույցում այսօր ասաց ՀՀ արդարադատության նախարար Սրբուհի Գալյանը:
«Բայց ես ստանձնել եմ պատասխանատվություն՝ ապահովելու խաղաղության ողջ գործընթացի իրավական ուղեկցումը, իրավական ապահովումը: Ես ամբողջովին կիսում եմ իշխող քաղաքական ուժի դիրքորոշումը՝ իրական Հայաստանի գաղափարախոսության հետ կապված և հանձն եմ առել պատասխանատվություն ապահովելու դրա իրավական ապահովումը»,-ասաց նա:
Հաջորդ ճշգրտող հարցին՝ կիսո՞ւմ է Նիկոլ Փաշինյանի վարած քաղաքականությունը, կո՞ղմ է, որ Արցախը ճանաչվի Ադրբեջանի մաս՝ Գալյանը պատասխանեց՝ ինքը խոսում է խաղաղության օրակարգի մասին։
«Պարոն վարչապետը դրա մասին շատ պարզ, հասկանալի մեկնաբանություններ է տվել իր հարցազրույցներում, և այդ գաղափարներն, այո՛, ամբողջությամբ կիսում եմ։
Մեր պետությունը բավականին բարդ ճանապարհով է անցել, և մեզանից որևէ մեկը 5, 6 կամ 7 տարի առաջ, գուցե, չկարողանար կանխատեսել այն խնդիրը, որի մեջ մենք հայտնվելու ենք այսօր։
Այսօրվա պայմաններում ես հավատում եմ իրական Հայաստանի գաղափարին և կարծում եմ, որ բոլորս՝ այդ թվում ես, ամեն ինչ պետք է անենք, որպեսզի կարողանանք ապահովել խաղաղ և անվտանգային միջավայր մեր երկրում»։
